capçalera campanha

Actualitats

InternacionalPoliticaSocietat

Lo Parlament Europèu a retirat l’immunitat parlamentària als elegits independentistas catalans en exili

Es lo primièr cas qu’una demanda d’aquela mena tròba una oposicion del mai del 40%. La Cort de Luxemborg ten ara la paraula

Lo Parlament Europèu a levat l’immunitat parlamentària als elegits independentistas catalans en exili Carles Puigdemont, Clara Ponsatí e Toni Comín, en seguida de la demanda de la Cort Suprèma espanhòla e segon un rapòrt prepausat pel bulgar d’extrèma drecha Angel Dzhambazki. Dins un vòte secret que se tenguèt diluns de ser, s’aprovèt dins lo cas de Puigdemont amb 400 vòtes en favor sus 693, 248 contra e 45 abstencions. Es a dire 400 vòtes en favor de li retirar l’immunitat e 293 qu’o an pas sostengut, çò es un 42% de vòte critic. S’agís d’un resultat amb una fòrta oposicion politica, car i a mai de vòtes critics que los qu’avián anonciat lo grop dels Verds-ALE e Esquèrra Unitària Europèa.
 
Demest los eurodiputats qu’avián ja anonciat lor oposicion al retirament de l’immunitat i aviá l’èx-primièr ministre socialista de Malta, Alfred Sant, que qualifiquèt d’escàndol que se poguèsse levar l’immunitat parlamentària als exiliats catalans elegits.
 
Los partits politics espanhòls que vòlon l’encarceracion de Puigdemont, Ponsatí e Comín son lo Partit Popular, lo Partit Socialista, Ciutadans e Vox, qu’amb lors aliats de l’eurocambra son majoritaris al Parlament.
 
 
Qué se passarà desenant?
 
Los tres elegits contunharàn d’èsser eurodeputats amb totes lors dreches e devers. Sonque quitaràn d’aver l’immunitat. Aquò vòl dire que lor caldrà tornar comparéisser davant la justícia bèlga quand la justícia espanhòla torne demandar lor extradicion en los acusant de sedicion e malversacion.
 
 
Lo precedent de Lluís Puig
 
Totun, poiriá èsser decisiu lo precedent de Lluís Puig, politician independentista catalan exiliat a Brussèlas e qu’es pas eurodeputat. La justíca bèlga rebutèt en agost passat, pel tresen còp, son extradicion car considèra que la Cort Suprèma espanhòla es pas competenta per jutjar los elegits catalans en exili.
 
 
La cort de Luxemborg ten ara la paraula
 
Ara, lo Parlament Europèu comunicarà formalament lo resultat d’aquel vòte a las autoritats espanhòlas, e aquestas reactivaràn los mandats europèus d’arrèst davant las justícias bèlga e escocesa. Mas lo magistrat instructor de la Cort Suprèma espanhòla a presentat de questions prejudiciàrias a la Cort de Justícia de l’Union Europèa (CJUE) per qu’especifique los critèris pels quals li poirián refusar un mandat d’arrèst europèu.
 
De lor caire, los avocats dels elegits catalans an tanplan anonciat que presentarián a la CJUE una demanda per que s’anullèsse lo retirament de l’immunitat, car s’es tengut dins un procediment tot plen d’irregularitats. D’un caire, denóncian la manca d’imparcialitat del president de la comission dels afars juridics, un bulgar d’extrèma drecha. D’autre caire, se remarca lo nombre extrèmament naut d’eurodeputats espanhòls que compausan la comission, lo fach que lo rapòrt atribuiguèsse un fals delicte a Clara Ponsatí e la manca de confidencialitat requerida, vist qu’un jornal espanhòl publiquèt lo rapòrt de Dzhambazki quand deviá èsser secret. Tant que la CJUE resolverà pas l’afar, los avocats dels catalans demandan que se mantenga provisòriament l’immunitat.
 
De soslinhar que l’eurocambra vòta fòrça sovent lo retirament de l’immunitat per certans eurodeputats, mas es lo primièr cas qu’una demanda d’aquela sòrta tròba tanta oposicion.
 
 
Embarrament total pels presonièrs politics
 
Tanlèu conéisser lo resultat del vòte al Parlament Europèu, la Cort Suprèma espanhòla ordenèt l’embarrament total dels presonièrs politics catalans, en seguida de la demanda que la faguèt lo ministèri public a l’endeman de las eleccions regionalas.
 
Dempuèi lo començament de febrièr, los presonièrs politics beneficiavan del dich “tresen gra”, çò es d’un regim penitenciari dobèrt, dins lo qual anavan dormir en preson del diluns al dijòus.
 
E mai las autoritats penitenciàrias considèren que los presonièrs politics catalans an aquel drech, la Cort Suprèma espanhòla, que los jutgèt e condemnèt, s’atribuiguèt un poder qu’aviá pas ela per metre fin al tresen gra. Las rasons per lor refusar aquel drech son que los presonièrs politics an pas demostrat “un pentiment e una reeducacion”.


 
 
 
 

 
 










abonar los amics de Jornalet

 

 

Etiquetas

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Bandièra05 1180x150: SIDILLÀ

Comentaris

francesc Palma
3.

Los grans partits politics europeus s'en foten de los Drets Umans. Son una porqueria per la democràcia !

  • 6
  • 2
Pitaluga
2.


Aquí avèm la pagèla per mesurar lo nivèl democratic d’Euròpa : es pietadós. O solfinàvem, e n’avèm un còp de mai la pròva. I a pas qu’una règla : desrengar pas lo sacro-sant Mercat. Quand parlarem e pensarem totes estatunians, serà encara mai simple pels afars dels superrics e lor vailets politicians.
Quant al govèrnament de Madrid, obten una victòria a la Pirrus. Los jutges franquistas son coma l’Armada espanhòla que se voliá manjar Anglatèrra, e finiguèt que la tempèsta se l’emportèt al fons de l’aiga. Lo tribunal de justícia europèu pòt èsser lo rocàs qu’enfonzarà lo batèu ufanós e bellicós, se se compòrta democraticament, coma es d’esperar.
Ara, de qu’espèra ERC per quitar d’apiejar lo Pedro Sánchez quand aqueste permet que contunhe la persecucion dels presonièrs politics, los dirigents republicans compreses ? O diguèri ja : fan coma lo gos que lèpa la man que l’acivada.
Mentretant, Catalonha òbra per la democratizacion de l’Euròpa financièra, tecnocratica e autoritària dels Estats. Contra aquela Euròpa òrra dels Estats, cal bastir l’Euròpa dels pòbles confederats liurament sus un projècte uman.

  • 16
  • 2
Franc Bardòu
1.

« Las autoritats penitenciàrias considèren que los presonièrs politics catalans an aquel drech, la Cort Suprèma espanhòla, que los jutgèt e condemnèt, s’atribuiguèt un poder qu’aviá pas ela per metre fin al tresen gra. Las rasons per lor refusar aquel drech son que los presonièrs politics an pas demostrat “un pentiment e una reeducacion”. »

Vos mainatz a de bon d'aquò ? Un pentiment ??? Son complètament capbords ? Imaginatz un tribunal suprèm favorable al Macron qu'exigiriá un "pentiment" a Hollande o a Sarkozy per non èsser d'accòrdi amb el sus una opinion politica ?

Los Espanhòls refusavan de dependre de França (napoleoniana) e èran donc independentistas, eles tanben ! Aquò ne fasiá de "pecaires" ? De gents mal educadas qu'aurián agut besonh de "reeducacion" ??? Los supremacistas espanhòls son (venguts ?) complètament capbords.

  • 19
  • 4

Escriu un comentari sus aqueste article