Lo presonièr grèc Dimitris Koufontinas es en cauma de la fam dempuèi l’8 de genièr e en cauma de la set dempuèi lo 21 de febrièr. Son estat de santat es fòrça marrit. Es condemnat a perpetuitat per terrorisme perque faguèt partida de l’organizacion revolucionària 17 de Novembre, e amb sa cauma protèsta contra l’empejorament de las condicions de son embarrament après que lo govèrn, que lo dirigís lo partit Nòva Democracia, aprovèt una lei per durcir las condicions dels condemnats per terrorisme. Tot fa pensar que s’agís de se venjar de l’assassinat de Pavlos Bakoyannis, conhat de l’actual primièr ministre de Grècia e paire del cònsol màger d’Atenas, çò rapòrta Directa.
 
Koufontinas es ara dins una unitat de suènhs intensius de l’espital de Lamia. Son estat de santat es critic e, se subreviu, aurà de sequèlas grèvas. Lo ministèri public exigiguèt l’alimentacion forçada del presonièr, mas lo sindicat dels trabalhadors dels espitals de Grècia refusèt aquela demanda, car l’ÒNU considèra qu’aquò seriá de tortura. D’organizacions, de personalitats, de deputats e lo sindicat dels jutges e procuraires demandan al govèrn grèc que càmbie de posicion. A mai, un milièr d’avocats e de jutges an signat un manifèst ont asseguran qu’an pas “drech de demorar silencioses quand la vida d’un caumaire detengut es en perilh immediat”.
 
 
Assumiguèt totas las responsabilitats
 
L’organizacion terrorista 17 de Novembre foguèt dissòuta en seguida de la confession de Savvas Xiros, arrestat per la polícia en 2002 après una explosion accidentala. Xiros faguèt de declaracions sus d’autres membres del grop, jos l’efièch de drògas psicoactivas, çò denóncia lo grop de sosten berlinés a Koufontinas. Aquò permetèt una granda operacion policièra que menèt a la dissolucion del grop. Lo 5 de setembre de 2002, Dimitris Koufontinas quitèt la clandestinitat, s’identifiquèt publicament coma membre de l’organizacion 17 de Novembre e assumiguèt la responsabilitat politica de las accions de l’organizacion. Pendent son jutjament se defendèt pas e denoncièt pas cap d’autre acusat de l’organizacion. Aquela actitud li faguèt ganhar lo respècte e la simpatia de grands sectors de la populacion grèga.
 
Dempuèi qu’es encarcerat, a participat a divèrsas luchas per melhorar las condicions de vida dins las presons grègas e a escrich lo libre Nasquèri lo 17 de novembre ont detalha las activitats de l’organizacion.
 
Lo 1r de març passat, de milièrs de personas manifestèron per las carrièras d’Atenas lor sosten al presonièr caumaire.