Dins lo monde d’abans la covid, quora lo President, lo ministre primièr o lo ministre de la santat parlavan al fenestron, lors paraulas solas sufisián per dire çò qu’avián de dire.
 
La covid es venguda traucar lors paraulas. E traucadas son vengudas voidas. Coma es pas aisit de se far comprene amb de paraulas voidas, s’ajudan de corbas, de cartas, d’esquèmas. Aicestes tenon los dos tèrces de l’ecran e los parlaires un tèrç.
 
Avètz d’un caire lo President plantat davant lo pupitre e de l’autre de corbas. Amb sovent cinc o sièis corbas que se passejan sul meteis tablèu. Amb la corba francesa que senhoreja en roge per mostrar que lo país se petaça melhor que los autres païses europèus fàcia a la covid. Las corbas corbejan a la velocitat de l’esliuç. As pas lo temps de n’espinchar una de prèp que passa que t’ai vist, ja una autra t’arriba.
 
Ara, lo ministre primièr totjorn plantat davant lo pupitre se jòga de las cartas per emplir de paraulas exagonalas voidas. Per aquò far, res non val de cartas exagonalas plenas. Amb tres o quatre colors qu’as pas temps de comprene çò que vòlon dire, ja una autra carta encolorada t’arriba. Sabes pas d’ont sortís, sabes pas perqué se’n va! De(s)cartas voidas, tant voidas coma las paraulas!
 
Lo ministre de la santat encara plantat davant lo pupitre, ara s’ajuda d’esquèmas. D’esquèmas bèls amb d’entresenhas pichonas que sabes pas cossí legir, amb d’indicas en bas, en naut, a drecha o a senèstra. As los uèlhs que montan, davalan, que viran d’un caire, de l’autre. Quora començas de poder legir los esquèmas, pataflèu! vaquí un zom sus la chifra que te vòlon far encapar.
 
Fin finala, amb totas aquelas corbas, cartas, esquèmas siás tan piòt abans de las aver entrevistas qu’aprèp. Te demandas se, coma las paraulas, elas tanben son pas traucadas. Amb de paraulas traucadas e de corbas, cartas, esquèmas traucats comenci de comprene perqué dison de longa que i a de “traucs dins la raqueta”!
 
 
 
 
Clamenç
umorista de lenga occitana
 
 
                          
            

fffff		fffff		fffff
	Lo confinament dels legeires de Jornalet
			Sès confinat a l’ostal? As, totun, de connexion a Internet? As de bonas idèas per passar lo temps? Jornalet demanda a sos legeires que partegen lors idèas e lor vida en confinament amb un messatge de tèxt, una fòto, un vidèo, un àudio o qué que siá que se pòsca publicar en linha e partejar amb los autres legeires. As bastit un castèl de carton pels enfants? Fas d’escalada dins la cosina? As organizat un concèrt per videoconferéncia? Tenes una vida sociala sus las fenèstras o los balcons? Fas d’espòrt a l’ostal? As de bons libres a nos recomandar? De bonas idèas per èsser tostemps de bona umor?
	Manda tos documents a info@jornale... Convivéncia e paratge en confinament.