En debuta de setmana passada, a la velha de la represa del campionat NRL, dos jogaires de tria anoncièron lor arrèst de las competicions:
— Cameron Smith daissa lo campion, son club professional de totjorn: Melbourne Storm, ont signèt tre 2002, aprèp una plan rica carrièra coma talonaire. A 37 ans, compta 430 partidas jogadas en NRL (327 coma capitani), 3 còps campions (mai 2 títols retirats a son club per rasons financièras), 2 Copa del Mond (56 seleccions amb los Cangorós), un dotzenat de sèrias ganhadas dels Estats d’Origina (amb Queensland). Es lo mai grand marcaire de punts de l’NRL amb 2810 punts marcats, mai que mai de penalitats e transformacions.
— Sonny Bill Williams demòra dins l’enquadrament dels Sydney Roosters per s’ocupar del novèl centre prometeire del club, lo jove Joseph Suaali. Ditz qu’a 35 ans, son genolh seguís pas mai e que se vòl consacrar a la bòxa. Lo neozelandés, nascut a Auckland dins una familha d’origina samoana, s’es distinguit tanplan a XV coma a XIII. A 18 ans, jogava pels Dògols de Canterbury que ganharàn lo títol. Coneis sa primièra seleccion pels Kiwis. En 2008, signa a XV a Tolon. En 2010, torna en Nòva Zelanda; passarà una sason en Japon, abans de jónher los Chiefs de Waikato, puèi los Blues d’Auckland. Es seleccionat 58 còps cò dels All Blacks e participa a las victòrias de 2011 e 2015 en Copa del Mond. Pren part als Jòcs Olimpics de Rio dins l’esquipa neozelandesa de rugbi de VII. A XIII, joguèt la Copa del Mond de 2013, ont los Kiwis arribèron en finala.
De retorn a XIII, son contracte a Toronto vira cort amb l’arrèst del club. Va dintrar a Sydney ont portarà, la sason passada, 5 còps lo malhòt dels Polets.
NRL: la primièra jornada balha lo ton
En Austràlia, l’entamenada de la sason se fa ja sus un bon ritme. Tre la primièra partida, Melbourne mòstra tota sa qualitat e son arrièr Ryan Papenhuyzen se met en evidéncia per batre los Lapinons 28-16.
A Brisbane, David Mead qu’arriba de Perpinhan marca lo primièr ensag pels locals fàcia a Parramatta, mas, coma l’an passat, lo segond temps es fatal pels Bròncos que menavan 16-0 a la pausa per pèrdre fin finala 16-24.
Los Warriors neozelandeseses en exili per un brave moment en Austràlia baton los Titans 19-6.
Pel TO, que tornava sus un terren aprèp un an sens jogar, las primièras doas partidas de Championship previstas a domicili son ja reportadas.
Lo primièr temps foguèt a l’avantatge dels occitans (24-10), mas aprèp la pausa, se comprenguèt qu’un club de Superliga es mai organizat qu’una formacion de Championship. Victòria pels Dragons: 40-28.
Elèit 1: mesa a jornincompleta
Tres partidas remesas se devián téner aqueste dimenge.
A Carcassona, pas de partida contra los Orses: un còp de mai, la covid se convidèt per complicar un pauc mai lo calendièr!
A Limós, los Grizlis recebián la formacion de Vilanòva que ven de cambiar d’entraïnaire en rason de resultats marrits. Victòria “a la quinzista” pels locals: 14 (quatre penalitats per un ensag transformat) a 6.
Direm pas “programa de la dimenjada qu’arriba”, mas “partidas previstas”: St Gaudenç-Dragonets, Limós-Avinhon, Tolosa-Lesinhan, Vilanòva-Albi e Carcassona-Palau.
Sonny Bill Williams | NRL
Etiquetas
Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.
Comentaris
I a pas cap de comentari
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
I a pas cap de comentari
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Escriu un comentari sus aqueste article
Senhala aqueste comentari