De tensions e de susmautas en Egipte. Los tres darrièrs jorns, i a agut almens 40 mòrts e de centenats de ferits en divèrses ponches del país. Las protèstas dels opausants al govèrn de Muhammad Mursi se son apondudas a la violéncia desencadenada per la senténcia sus tragèdia de Pòrt Saïd.

Lo govèrn e l’armada d’Egipte se prepausan de decretar lo cobrifuòc per ensajar d’amortir una situacion qu’es venguda incontrarotlabla. Lo ministre de l’Informacion egipcian, Salah Abd Al Maqsud, a avertit que farà tornar la calma per carrièras “de la faiçon que calga”.
 
Divendres, èra lo segond anniversari de la revòlta egipciana, e los opausants al president islamista Muhammad Mursi o aprofechèron per reviscolar la flama de la protèsta. Las manifestacions s’acabèron per d’afrontaments amb la polícia que s’alonguèron tota la dimenjada. Divendres, pasmens, foguèt lo jorn mai sagnós, amb nòu mòrts a Suèz.
 
A las manifestacions se son apondudas las protèstas, dissabte passat, contra una senténcia judiciala que condemna a mòrt 21 personas per lo massacre al terren de fotbòl de Pòrt Saïd, arunan, que i moriguèron 74 personas. La senténcia a pas agradat a las familhas e als seguidors de l’esquipa, qu’an provocat de violents incidents als entorns de la preson ont i a los condemnats. Los afrontament amb la polícia e amb l’armada an faches almens 31 personas mòrtas.
 
La situacion se calma pas. A Pòrt Saïd, la violéncia s’amortís pauc a cha pauc, mas dins la rèsta del país, las susmautas an contunhat la matinada de dimenge. De partisans e d’opausants del president Mursi se son afrontats près de la Plaça Tahrir, al Caire, e mai a Alexàndria e a Suèz.
 
Dins la Plaça Tahrir, e mai se los policièrs antisusmautas an fach evacuar la plaça mai d’un còp amb violéncia, i a tornarmai de concentracions.
 
Los afrontaments mai durs se produsiguèron a Suèz, ont de manifestants mascats assautèron un comissariat e l’incendièron.