Qualques milièrs de personas manifestèron ièr dimenge, jos la pluèja, a Sant Jaume de Compostèla (Galícia), convocats per Queremos Galego (volèm de galèc), una plataforma d’associacions per la lenga del país. Los ciutadans reclamèron al govèrn la retirada del polemic “Decret del Plurilingüisme” del ministre de l’educacion espanhòl, José Ignacio Wert, que, per lo primièr còp en l’istòria, redusís la preséncia de la lenga del país a l’escòla.
 
Dins lo discors final, lo president del Burèu per la Normalizacion del galèc (Mesa pola Normalización), Carlos Callón, avertiguèt lo Partit Popular (PP) que, dins Queremos Galego, i participan d’organizacions de totes los sectors levat d’eles. Lo pòrtavotz parlèt tanben contra lo projècte estatal de reforma de l’ensenhament, que lo qualifiquèt de “Lei de la Wergonha” en referéncia al ministre de l’Educacion.
 
La marcha se debanèt sens cap d’incident, dins un jorn de fòrta pluèja, çò que provoquèt que la manifestacion foguèsse mens nombrosa qu’en d’autras ocasions.
 
Ça que la, Queremos Galego a capitat tornarmai amb sa capacitat de mobilizacion, sustot dempuèi que lo PP a conquerit lo govèrn de Galícia. La plataforma pel galèc amassa qualques centenats de collectius de totas las ideologias, a l’excepcion dels que son près del PP. Ça que la, en la protèsta d’ièr, a Compostèla, los manifestants portavan gaireben exclusivament de distintius d’organizacions nacionalistas d’esquèrra.
 
Callón acabèt lo sieu parlament amb lo remembre de la mòrt d’Avelino Pousa Antelo, qu’agiguèt de pòrtavotz dins de mobilizacions passadas. L’acamp se concluguèt amb l’imne e amb lo crits d’“en Galícia, en galèc!” e “Independéncia!”.
 
Mai d’informacions sus Galícia Confidencial.