Aürosament que dins nòstras encontradas, aprofecham una medecina de mai en mai ponchuda. Ponchuda mercé als especialistas e a las maquinas.
 
Avèm, per astre, l’especialista de l’artelh gròs del pè drech, l’especialista del genolh senèstre, l’especialista de l’embonilh, l’especialista de la paleta de l’espatla drecha, l’especialista de la suca del cap, l’especialista del guinhaire de la man senèstra e dins aquelas especialitats avèm de sosespecialitats amb l’especialista de l’onça del det gròs senèstre, l’especialista de la noseta del genolh drech, sens parlar de l’especialista de l’agacís!
 
Avèm l’especialista del budèl prim, l’especialista del fetge, l’especialista del pancreàs, l’especialista de la valva del còr, l’especialista dels lèus, l’especialista de la corniòla, l’especialista de l’aurelhon de l’aurelha, l’especialista de la narra del nas, l’especialista del viston de l’uèlh, l’especialista del suc del suquet, l’especialista del cais del caissal drech!
 
Per malastre, nos en manca un, l’especialista vaccinaire o fissaire. S’aviam agut de fissaires de mestièr, tota Occitània seriá dempuèi un bèl brieu ja vaccinada. Los mètges, las infirmièras, las levandièras an mai qu’aquò de far! Se patinam, s’avançam pas, es per manca d’especialistas. Nos manca de fissaires de mestièr. Un còp de mai an pas sauput preveire los vaccins e los vaccinaires!
 
Es qu’auràn encara temps de los formar? Formar un fissaire de mestièr demanda d’annadas. Saber causir l’agulha bona que conven al vaccin. Aprene a engulhar lo botelhon per ne tirar sièis dòsis quora n’es previst pas que cinc. Es pas totòm que pòt arribar de fissar dètz personas quora se'n presenta que uèch! Aprene a desengulhar lo botelhon sens tremolar. Aprene a far dintrar l’agulha dins la pèl demanda una coneissença aprigondida d’aicesta: carn tendroneta, carn amb de tiras... Aprene a quichar sus la seringa de longa, doçamenet sens trantalhar... Caldriá pas que la pandemia tirèsse son camin abans que los fissaires de mestièr foguèsson formats.
 
Se, per malastre, mancava de candidats per aquela formacion, se caldriá benlèu virar dau las maquinas. Uèi son d’una ajuda granda pels metges. Te radiografian dels pès a la tèsta. E benlèu passar a las maquinas automaticas, coma las avèm dins las garas per las bilhetas de tren, coma las avèm per carrièras per los bilhets de banca. Aquels punts intensius fissaires (PIF) serián pas dins los espitals, mas los poiriam trobar a l’intrada dels supermercats, de las salas d’espectacles, de las boitas de nuèch, de las garas, dels aeropòrts... Sufiriá de se pegar lo cuol al PIF, l’agulha fisssaira sortiriá, PAF, fissat! Plegat! Te demorariá de te virar per prene lo certificat de vaccinacion!
 
E dire que quand èri pichonet ma mameta païsana, tota soleta, fissava tot lo vilatge!
 
 
 
 
Clamenç
umorista de lenga occitana
 
 
                          
            

fffff		fffff		fffff
	Lo confinament dels legeires de Jornalet
			Sès confinat a l’ostal? As, totun, de connexion a Internet? As de bonas idèas per passar lo temps? Jornalet demanda a sos legeires que partegen lors idèas e lor vida en confinament amb un messatge de tèxt, una fòto, un vidèo, un àudio o qué que siá que se pòsca publicar en linha e partejar amb los autres legeires. As bastit un castèl de carton pels enfants? Fas d’escalada dins la cosina? As organizat un concèrt per videoconferéncia? Tenes una vida sociala sus las fenèstras o los balcons? Fas d’espòrt a l’ostal? As de bons libres a nos recomandar? De bonas idèas per èsser tostemps de bona umor?
	Manda tos documents a info@jornale... Convivéncia e paratge en confinament.