La Cort de Cassacion confirmèt dimars passat lo non-luòc dins l’afar Rémi Fraisse en barrant tota eventualitat d’un procès, çò rapòrta Reporterre.
 
Segon la justícia, res non se passèt dins la nuèch que tuèron Rémi Fraisse; lo manten de l’òrdre foguèt corrèctament assegurat e la proporcionalitat de l’usatge de las armas foguèt respectat.
 

 
Rémi Fraisse foguèt tuat en octòbre de 2014 per una granada que lancèt un gendarma dins l’encastre de la repression d’una protèsta contra la construccion d’una restanca a Sivens (Galhaqués). Pasmens, l’enquista judiciària sus sa mòrt finiguèt en genièr 2018 sus un non-luòc, après una longa lucha de la familha Fraisse en cèrca de justícia.
 
Ara, la familha de Fraisse denóncia la “denegacion d’una doctrina de gestion de las molonadas que protegís pas pus, nafra e mutila”. La maire e la sòrre de Rémi Fraisse, e tanben lor avocata, an publicat un comunicat comun ont remembran que dins aquela trista nuèch d’octòbre a Sivens, los gendarmas empleguèron mai de 400 granadas, dont 42 granadas OF-F1, qu’una d’elas tuèt Rémi Fraisse. Aquela arma, alavetz considerada non letala, foguèt interdicha dins la prima de 2017.

Lo numèro 2 de la revista de Jornalet en papièr rapòrta sus 15 paginas lo combat que se tenguèt contra lo projècte d’un barratge dins lo bòsc de Sivens que costèt la vida al jove ecologista tolosan.

 

Notre communiqué suite a l'arrêt de la Cour de cassation. pic.twitter.com/8ZlsR7rvVZ

— Claire Dujardin (@DujardinClaire) March 23, 2021

 
 

    

fffff		fffff
	Una protèsta populara ganhada, al prètz d’un òme mòrt   Fraisse èra un jove estudiant tolosan de botanica, que foguèt tuat a 21 ans dins la nuèch del 25 al 26 d’octòbre de 2014, dins l’encastre de la repression d’una protèsta populara que comencèt d’un biais plan pacific contra la construccion d’una restanca dins la zòna umida del Testet, a Sivens (Galhaqués).   Al començament del mes de julhet, la justícia donèt rason als opausants de la restanca de Sivens. Foguèron anulladas la declaracion d’utilitat publica, l’autorizacion d’eissartatge e la derogacion sus las espècias protegidas. E mai l’estat foguèt condemnat a pagar 3750 èuros a las associacions. “Aurà calgut un mòrt per que tot s’arrèste”, çò diguèt Ben Lefetey, pòrtavotz del collectiu Testet.   Lo gendarma que lancèt la granada mortala sus Rémi Fraisse foguèt entendut per de jutges de Tolosa dins l’encastre de l’informacion judiciària dobèrta per “violéncias volontàrias qu’an entraïnat la mòrt sens intencion de la donar”.   De fach, la mòrt de Rémi Fraisse portèt la crisi al govèrn francés. Las nombrosas susmautas qu’esclatèron per tot l’estat francés, en seguida de la mòrt de l’estudiant de botanica, portèron de problèmas al govèrn de la Republica.   Lo govèrn francés ensagèt de reglar la mòrt del jove tolosan en enebissent l’usatge de las granadas e en suspendent los trabalhs del barratge, mas un larg sector de la societat, los movements ecologistas e de partits d’esquèrra demandèron la demission del ministre Cazeneuve, que se limitèt a dire que i auriá “de sancions se s’es comés de fautas”. Las protèstas e las susmautas percorreguèron tot l’estat, la majoritat amb d’afrontaments violents entre manifestants e policièrs. Un projècte abandonat L’estat francés abandonèt definitivament lo projècte de la restanca de Sivens (Galhaqués), dins una discrecion totala lo 24 de decembre de 2015. L’estat acordèt al departament de Tarn 3,4 milions d’èuros en compensacion, çò es 2,1 milions per las despensas de pura pèrda e 1,3 milion per reabilitar la zòna umida qu’es restada fòrça degalhada après los trabalhs.