Goodwill Zwelithini, rei de la nacion zolo, defuntèt lo 12 de març passat dins sos 72 ans dins la vila de Durban. Zwelithini a regnat pendent mai de 52 ans sus la nacion zolo, en Sud-Africa.
 
Segon la constitucion d’aquel estat, lo rei a un ròtle mai que mai ceremonial. Ça que la, lo president sud-african Nelson Mandela aviá tractat dirèctament amb el pendent tot lo combat per metre fin a l’Apartheid.
 
 
Un rei controversiat
 
En genièr de 2012, lo rei faguèt polemica en declarant que las relacions omosexualas èran “poiridas”. Sas declaracions foguèron condemnadas per la comission sud-africana dels dreches umans e tanben per de grops de defensa dels dreches LGBT. Lo president de Sud-Africa Jacob Zuma convoquèt lo rei per li reprochar sos comentaris.
 
Puèi, l’ostal reial zolo declarèt que los comentaris del rei èran mal traduches, que lo monarca aviá pas condemnat las relacions omosexualas mas qu’èra tafurat de la "degradacion morala” en Sud-Africa qu’aviá menat, segon el, a d’abuses sexuals generalizats, compreses entre òmes.
 
A mai, en 2015, mentre que lo país coneissiá de susmautas e de violéncias contra los immigrants africans, Goodwill Zwelithini demandèt als estrangièrs de “far lors valisas”.
 
 
Una succession indirècta
 
Dins la cultura zolo, las transicions reialas son pas automaticas. Amb sas 6 femnas, ja que la poligamia es correnta entre los elèits de Sud-Africa, lo rei es lo paire de 28 enfants. Es doncas lo moment de las negociacions entre las diferentas brancas de la familha, caduna restacada a una esposa.
 
Per ara, la reina Mantfombi Dlamini, dins sos 65 ans,sortida de la familha reiala del reialme vesin d’Eswatini qu’es un país independent, es estada designada pel testament del defunt rei coma regenta. Es, per tant, en tota logica son filh ainat, lo prince Misuzulu Zulu qu’es lo favorit per la succession al tròn. Nascut en 1974 a Kwahlabisa, estudièt dins una universitat de Florida.
 
 
 
 
Ruben Castellnou/Redaccion