Las fòrças de l’ordre tuèron almens 107 manifestants dissabte passat en Birmania. S’agís de la repression pus sagnosa dempuèi que comencèron las protèstas contra lo còp d’estat militar del 1r de febrièr passat. Segon l’ONG Assistance Association for Political Prisoners (AAPP), las fòrças de l’òrdre an tuat 459 personas dempuèi lo putsch. Doncas, de quatre parts d’aquelas victimas una trobèt la mòrt dissabte.
 
Las protèstas de dissabte se tenián mentre que l’armada celebrava sa grand passacarrièra annadièra dins la capitala, Rangun, jos la presidéncia del general Min Aung Hlaing. Segon l’AAPP, los militars fusilhèron los manifestants dins mai de quaranta vilas de 9 regions, dont la capitala.
   
Ça que la, los manifestants tornèron prene las carrièras l’endeman dimenge, e la polícia e los militars fusilhèron e tuèron mai de manifestants.
 
 
Comunicat conjonch de las armadas de 12 païses
 
La comunautat internacionala a exprimit tota son orror. Los caps de las armadas de dotze païses, dont los Estats Units, lo Reialme Unit, Japon e Alemanha, an condemnat los faches. Dins una istorica declaracion conjoncha, aqueles dirigents militars an dich qu’“una armada professionala ten la responsabilitat de protegir las personas que servís, non pas de lor portar tòrt”.
 
De lor caire, Michelle Bachelet e Alice Wairimu Nderitu an afortit, en nom de l’ÒNU, que “las accions vergonhablas, coardas e brutalas de l’armada e de la polícia se devon arrestar sul pic”.
 
 
Tornarmai la dictatura militara
 
Lo 1r de febrièr, l’armada arrestèt Aung San Suu Kyi e d’autres dirigents del partit al govèrn, prenguèt lo poder sul país e declarèt l’estat d’urgéncia en tot acusar de frauda las eleccions legislativas de novembre passat. Lo putsch lo faguèron lo meteis jorn que se deviá constituir lo parlament sortit de las eleccions del 8 novembre amb una Aung San Suu Kyi plan refortida. La cap birmana e son partit istoric d’oposicion a la dictatura aviá ganhat clarament las eleccions vistas coma un referendum sus la gestion del govèrn de la filha del paire de l’independéncia birmana.
 
Los militars avián dirigit Birmania pendent gaireben cinquanta ans, fins a 2011, quand lo país comencèt son evolucion devèrs a un sistèma mai democratic. En 2015, la Liga Nacionala per la Democracia —dirigida per Aung San Suu Kyi— obtenguèt pro de deputats per bastir un govèrn democratic. Las eleccions del novembre passat foguèron sonque las segondas dempuèi la fin del govèrn militar.
 
 
 

 

“We urge the Myanmar Armed Forces to cease violence and work to restore respect and credibility with the people of Myanmar that it has lost through its actions,” the Chiefs of Defense of and the stressed.

READ: https://t.co/Bhha1DPYjfpic.twitter.com/bGQkHHW2Xu

— U.S. Asia Pacific Media Hub (@eAsiaMediaHub) March 28, 2021