Lo nombre de victimas de l’incendi dins una discotèca del sud de Brasil es de 245, segon los còrses recuperats fins a ièr de ser; es çò qu’a raportat Cleberson Bastianello, comandant d’un batalhon d’operacions especialas de la polícia militara a Santa Maria. 48 personas son feridas e menadas als espitals de la region. Qualques testimònis an dich que la causa del fuòc seriá lo material pirotecnic, que s’èra alucat pendent la performança d’un grop musical, e qu’auriá mes fuòc a l’isolament acostic que cobrís lo tech. Ça que la, la majoritat dels mòrts seriá arribada per una avalanca umana e per asfixia, pr’amor que i aviá solament una sortida de l’encencha.
 
Lo comandant dels pompièrs de l’estat del Rio Grande do Sul, Guido Pedroso de Melo, a explicat a la television Globo News qu’a vist de còrses sens vida amolonats al bòrd de las pòrtas de la discotèca Kiss, de Santa Maria, ont s’es debanada la tragèdia, a qualques 300 quilomètres a l’oèst de la capitala estatala, Porto Alegre.
 
Los subrevivents an explicat que la discotèca s’empliguèt còp sec d’un fum negre fòrça dens, en provocant la panica de las 500 personas que i aviá aperaquí en aquel moment dins l’encencha, pendent una fèsta universitària.
 
La catastròfa a esmoguda la populacion e la quita presidenta brasilièra, Dilma Rousseff, qu’a interromput la siá participacion a la reünion dels estats latinoamericans de Chile. “En aqueste moment de tristesa sèm totes amassa”, çò a declarat Rousseff, clarament esmoguda.