Itàlia durcís las restriccions davant las vacanças de Pascas. Lo Ministèri de la Santat a anonciat que totas las personas qu’intrarián dins l’estat italian de l'UE estant, e mai s’an lo ciutadanatge italian, aurián de presentar una PCR del resultat negatiu e aurián de demorar cinc jorns en quarantena. Atal, per anar de Barcelona de Provença a la Val d’Estura caldrà presentar un provament negatiu de covid-19 e s’embarrar pendent cinc jorns.
 
Lo ministre de la santat, Roberto Speranza, a signat aquel nòu òrdre per apasimar las nombrosas criticas contra lo govèrn de Mario Draghi que, fa qualques jorns, decretèt lo durciment de las restriccions per Pascas —comprés lo confinament domiciliari dins qualques regions dont las Valadas e la Gàrdia—, mas que permetiá l’intrada de toristas e la sortida d’italians a l’estrange.

 
Escòlas barradas dins tot l’estat francés per tres o quatre setmanas

Lo president francés, Emmanuel Macron, anoncièt ièr de ser lo barrament de las escòlas, collègis e licèus dins tot l’estat francés en unificant totas las zònas de vacanças, e l'espandiment d'un confinament per perimètres d'un desenat de quilomètres. Lo cobrifuòc se manten a 19h. Los estudiants universitaris poiràn assistir als corses presencials un jorn per setmana. 
 
Pertocant la cultura, lo léser, las terrassas, los restaurants e l’espòrt, Macron s’es engatjat a los redobrir dins lo mes de mai amb un plan gradual fins a l’estiu.
 

Durciment de las mesuras en Irlanda
 
De son latz, lo govèrn irlandés a anonciat l’inclusion de divèrses païses sus la lista de zònas de naut risc per la covid-19, de sòrta que los viatjaires sortits d’aqueles endreches deuràn passar una quarantena de 14 jorns dins una ostalariá. Aqueles isolaments los devon pagar los quites viatjaires e an un còst de gaireben 2000 èuros.
 
Demest los païses afectats se tròba Alemanha e los estats francés e italian: pasmens, demòran al marge de la mesura lo Reialme Unit e l’estat espanhòl.