Dins lo quartièr de la Gara Sant Joan, al caireforc de las carrièras Billaudel, Fieffé e Francin, la comuna de Bordèu es a installar una microforèst sus 240 m². Aquel espaci de vegetalizacion aurà mai d’una amira, especialament de refrescament e de convivéncia.
 
Los agents de la Metropòli venon d’engatjar lo talhièr de creacion d’una microforèst a la debuta del mes de març. Primièr, an rasclat lo quitran d’un ancian parcatge per tornar trobar la tèrra e ara son a plantar d’arbres, d’èrbas e de plantas de diferentas nautors per crear d’estrats vegetals, coma dins una forèst naturala. Segon Didier Jeanjean, adjunt en carga de la natura en vila e dels quartièrs apasimats e Olivier Cazaux, cònsol adjunt de Bordèu Sud, qu’an presentat lo prètzfach sus la pagina Facebook del quartièr concernit, l’idèa màger del projècte es la seguenta: plantar de varietats localas e adaptadas de plantum e metre ensems la mai granda diversitat vegetala possibla pr’amor de crear un ecosistèma vertadièr e durable, mai resistent a las malautiás. Se ditz que la microforèst deu revertar los bòsques de l’Entre Duas Mars amb la preséncia de garrics, d’aseraus e d’arbres fruchièrs.
 
Lo projècte vai quèrre son inspiracion dins las tecnicas de l’agroforestariá e lo metòde de reforestacion popularizat pel botanista japonés Akira Miyawaki. S’agís de recreear una forèst naturala dins un temps cort e un espaci limitat, de sòrta qu’aquesta se poirà ça que la manténer d’esperela. L’espèr es qu’aquela realizacion permeta de demesir la pollucion de l’aire e l’empacha sonòra, e de far baissar la temperatura a l’entorn. D’efièch, es estat provat que tanlèu plantats 100m², la temperatura cai d’1°C dins un rai de 100m a l’entorn. Los primièrs efièches son esperats d’aicí a dètz ans.
 
Lo cònsol màger Pierre Hurmic espèra d’èsser sollicitat pels estatjants pr’amor de poder renovelar lèu-lèu l’operacion dins d’autres quartiers bordaleses.

 
 
 
Tomàs Hirondelle
 
 

 
 
 
Mai d’informacions sus Sud Ouest: