Aquestas Pascas de 2021 foguèron mens ovalas que de costuma. La Superliga prepausèt pas lo maraton costumièr del temps de prima amb 4 partidas en quinze jorns; pas de rendètz-vos bèl lo diluns pascal a Brutus.
 
De mai, la jornada d’Elèit 1 se trapèt resumida a una partida; la segonda prevista (Vilanòva-Palau) remesa en rason de la covid. Quora tornarà la prima ovala?

Superliga: segond viatge victoriós pels Dragons
 
La segonda jornada de Superliga organizava sas 6 partidas sul terren de Saint Helens.
 
Dissabte de vèspre, los catalans èran opausats als Gigants d’Huddersfield. Faguèron lo trauc dins lo primièr temps (20-6) e resistiguèron dins lo segond per ganhar (20-10).
 
Los Tigres de Castleford foguèron mai fòrts que Leeds 18-10. Victòrias mai largas per Wigan (34-6 contra Wakefield), St Helens (25-0 fàcia a Hull KR) , Warrington (44-12 contra Leigh) e Hull FC que bat Salford: 35-4.
 
Ara, plaça a la Cup amb la recepcion de Wakefield, levat que pels besonhs de la BBC que retransmetrà la partida, los catalans tornaràn trapar la pelena de Saint Helens per jogar dissabte “a domicili”! En cap d’aficha d’aqueles 8ns de finala: l’oposicion entre Leeds e Saint Helens.
 
A priòri, los Sang e Aur deurián puèi reçaupre los Diables Roges de Salford lo dissabte 17 d’abril a Brutus.
 
 
Championship: la bona entamaneda pel Tolosa Olimpic
 
Aprèp una annada sens jogar, lo Tolosa Olimpic tornava trapar la competicion amb la represa del Championship. Represa marcada per una victòria a York: 21-6.
 
Los Occitans tornaràn jogar sus l’estadi Ernèst Wallon lo dissabte 17 d’abril amb la recepcion dels Cavals Fòls de Londres..
 
 
NRL: Penrith en cap de fila
 
En signant una victòria bèla a Manly (46-6), las Pantèras de Penrith s’installan a la primièra plaça de l’NRL: sol club sens desfaita aprèp 4 jornadas de competicion.
 
Los Polets de Sydney lançan dins lo grand banh lo jove Sam Walker (18 ans) per remplaçar lor menaire de jòc Luke Keary e baton los neozelandeses: 32-12.
 
 
Elèit 1: Carcassona se fa paur
 
Aprèp la victòria bèla del dèrbi fàcia a Lesinhan, Carcassona presentava una formacion rejovenida fàcia al Tolosa Olimpic Elèit. Los Canaris capitèron jamai a embalar la partida e demorèron jos la menaça d’una còla volontària e jogaira. Los audencs se contentaràn d’una victòria magrostina: 24-22.
 
Al programa de la dimenjada venenta, se tot va plan: lo dèrbi catalan Palau-Dragonets; Carcassona-Avinhon; Limós-Albi; St Gaudenç-Lesinhan e Tolosa-Vilanòva.
 
 
 
 
Alan Roch