Coma cada dimenge de Pascas, los bascos an festejat lor fèsta nacionala, dicha Aberri Eguna. En despièch de las mesuras sanitàrias, s’es tengut d’acamps sus divèrsas plaças dins tot lo Bascoat. La crida l’aviá facha lo collectiu basquista Euskal Herria Bat (Un País Basco) amb lo sosten dels principals partits d’esquèrra. Los manifestants an revendicat lo drech d’autodeterminacion del Bascoat e lo raprochament dels presonièrs dins de presons bascas. Delà los drapèls bascos, se podiá veire de bandièras independentistas catalanas, escocesas, galègas, irlandesas, galesas, còrsas...
 
Lo coordinator general d’EH Bildu, Arnaldo Otegi, a reclamat “un futur fondat sul drech de decidir e la territorialitat”, e a revendicat “la sobeiranetat per far camin vèrs l’independéncia del Bascoat a un moment que, a l’ombra de las prigondas crisis dels estats espanhòl e francé, se refortisson las tendéncias a l’autoritarisme e a la desdemocratizacion”. “Aqueste pichon país qu’es pas encara estat reconegut pel Mond pòt ofrir son granet de sable dins aquela crisi umana e planetària, amb la sostenibilitat de la Tèrra maire e la vida digna de tota persona coma tòcas”, çò a dich.
 
Tanben l’autonomista Partit Nacionalista Basco (EAJ-PNV) a fach son eveniment politic. Lo president del partit, Andoni Ortuzar, defendèt lo refortiment de l’autogovèrn per obténer un nòu pache politic que permetèsse de “decidir l’avenir actual e lo de las generacions seguentas”. Ortuzar a afirmat que son partit compren la bastison nacionala coma “un procès gradual”, que se fa “amb de passes mesurats, mas fermes” e que deu, abans tot, plaçar de “solidas fondamentas per bastir l’ostal comun pels bascos”.