Sièis ans après la tragèdia aeriana qu’aguèt luòc al Puèg dels Tres Evescats (Prealps de Dinha) a las familhas de las victimas lo fisc espanhòl reclama que paguen un impòst sus una compensacion que la lor paguèt Lufthansa.
 
Lo Congrès dels Deputats espanhòl aprovèt una proposicion de lei per que las victimas d’aquela tragèdia foguèsson dispensadas d’impòst sus l’indemnitat recebuda. Pasmens, la lei s’estanquèt pendent qualques meses dins una comission de trabalh e se poguèt pas aplicar quand se dissolguèt lo parlament espanhòl en abril de 2019 a causa de la convocacion de nòvas eleccions. Ara lo fisc espanhòl exigís de las victimas d’impòstes sus aquela indemnitat recebuda, coma s’aguèsson ganhat un prèmi a la lotariá.
 
De remembrar que, lo 24 de març de 2015, un avion qu’anava de Barcelona a Düsseldorf foguèt escrachat volontàriament pel copilòt, Andreas Lubitz, un òme de 28 ans qu’aviá de problèmas de santat mentala. Moriguèron 149 personas. Ara a las familhas de las victimas lo tresaur public espanhòl reclama 800 000 èuros dels 3 milions que recebèron de Lufthansa coma compensacion.
 
 
Lo vòl de Cristina
 
Sus aquela tragèdia se ven de publicar un libre escrich en catalan per l’occitanista Marçal Girbau entitolat El vol de la Cristina. L’òbra explica l’istòria de Cristina, una neuroscientifica que trabalhava a Bayer e que moriguèt en aquel escrachament. Dins lo libre, Girbau analisa las negligéncias e la dolor non reparada après aquel atemptat que jamai non foguèt considerat coma un atemptat.
 
A prepaus d’aquel libre Vilaweb publica una entrevista de Girbau.