Per temps de covid, la masqueta nos escond lo nas, las pòtas, las dents, lo menton, lo còl , es malaisit de partejar bèbas, risolets, cacalasses ... nos demòra los uèlhs per... escambiar.
 
Amb lo viston podèm devistar mas tanben nos estonar, nos encantar... e las cilhas nos i ajudan. Mas i a cilhas e cilhas. Avèm las cortetas pauc sarradas, las longuetas espessas. Las femnas pòdon jogar tanben sus la longor, l’espessor e la color de las falsas cilhas.
 
Dison pas la meteissa vertat las falsas cilhas se son cortincèlas negretas naturalas que se son longas, tenchas al mascara. N’i a de longarassas finetas negre cheminièra. N’i a de longassas espessas verd sanha. N’i a de longuetas finas blau de mar.
 
Las parpèlas elas tanben parlan. Se son clafidas de patas d’aucas an pas lo meteis dire que se son estiradas sens plecs, ni regas. Las parpèlas amb pòchas jos los uèlhs elas tanben parlan. Encara doas pochetas, rai! Mas se son doas pochassas coma bofiguetas, pecaire!
 
Las ussas, elas tanben, pòdon èsser longas o cortas, espessas o finas , negras o grisas o... Las femnas se las pòdon far talhar en fina mièja luna, en poncha espessa, en triangle estequit o arredondit... Se las far colorar de negre negre, de negre estelat, de negre belugaire. Se las far desespessir o se las far rasclar e tornar dessenhar, tornarmai fardar.
 
E puèi lo front. N’i a de totas menas, de rafits, de lises, de blancs, de jaunes, de negres, d’arredondits, de cairats... que càmbian l’agach portat pels uèlhs. Agach, encara desparièr, se passa tras de clucas de las brancas espessas, finas, escalhadas, mirgalhadas... de clucas als veires de fogal doble o lindes. Se son negres, aquí per passar l’agach, flambat!
 
Sabèm dempuèi los trobadors e benlèu abans, que lo prus amorós passa pels uèlhs. Per temps de covid e de masqueta, l’agach a pres encara mai de pes per dire sos sentits, per far passar sas envejas, sas esmogudas.
 
Amb la masqueta, lo fardatge dels uèlhs pren de mai en mai de pes. Me foguèt dich que se la venda del roge per las pòtas aviá bravament demesit, la venda del mascara aviá fortament pojat. Se per ara potonejar es de mens en mens aisit, far l’uèlhon es de mai en mai presat. As-uèlhs!
 
 
 
 
Clamenç
umorista de lenga occitana


 
 
                          
            

fffff		fffff		fffff
	Lo confinament dels legeires de Jornalet
			Sès confinat a l’ostal? As, totun, de connexion a Internet? As de bonas idèas per passar lo temps? Jornalet demanda a sos legeires que partegen lors idèas e lor vida en confinament amb un messatge de tèxt, una fòto, un vidèo, un àudio o qué que siá que se pòsca publicar en linha e partejar amb los autres legeires. As bastit un castèl de carton pels enfants? Fas d’escalada dins la cosina? As organizat un concèrt per videoconferéncia? Tenes una vida sociala sus las fenèstras o los balcons? Fas d’espòrt a l’ostal? As de bons libres a nos recomandar? De bonas idèas per èsser tostemps de bona umor?
	Manda tos documents a info@jornale... Convivéncia e paratge en confinament.