En junh de 2000, cinc ans après lo referendum d’independéncia de Quebèc, aquela província, çò es estat federat de Canadà, aprovèt la Lei 99, que regulava lo drech de secession unilaterala de Quebèc. Aquela lei foguèt combatuda pel cap del ja escantit Partit de l’Egalitat, Keith Henderson, mas son recors es ara, enfin, anullat après la decision de la cort d’apelacion de Quebèc, que valida los sièis articles contestats.
 
Aqueles articles soslinhan que “lo pòble quebequés a drech inalienable d’elegir liurament lo regim politic e l’estatut legal de Quebèc” e establís lo critèri del 50%+1 dels vòtes per validar l’independéncia de la província. Lo jutge, Robert Mainville, ditz qu’aqueles ponches respèctan la Constitucion, coma o aviá ja dich lo Tribunal Superior en 2018.
 
“Es trist de veire qu’una nòrma coma lo 50% +1 a de besonh d’una lei especifica e de doas decisions judiciàrias per èsser reconeguda. Deuriá pas èsser aital dins una democracia normala”, çò diguèt Paul St-Pierre Plamondon, cap del Partit Quebequés.