Voldriam metre endavant per entamenar aquesta cronica las prestacions aqueste dissabte de dos Sam:
 
— Sam lo Jove: Sam Walker ten tot bèl just 18 ans. Los Roosters an degut demandar una dispensa a l’NRL per que pòsca jogar la competicion màger. Amb la nafradura bèla de lor menaire de jòc, Trent Robinson a fait apèl al jove mièg per menar l’ataca de la formacion. Aqueste dissabte, fàcia a las Làmias, los Pols èran mal embarcats quand revirèron la situacion dins lo darrièr quart d’ora. Sam Walker es plan implicat dins lo capvirament: doas passas sautadas decisivas (una sus l’ala esquèrra, l’autra sus l’ala dreita) e tanben un ensag personal que menan a la victòria de la formacion de Sydney: 26-18.
 
— Sam l’Ancian: bon, el, ten ara 32 ans, lo Sam Tomkins, mas s’impausa de mai en mai coma una pèça màger dels Dragons. Ven d’èsser designat dos còps de seguida òme de la partida per las victòrias dels Sang e Aur contra Huddersfield, puèi aqueste dissabte per l’eliminacion en 8n de Cup de Wakefield: 26-6. Sus una finta de passa, es el que marquèt lo primièr ensag dels catalans. Se lo vegèt prene la paraula per remosar sos coesquipièrs aprèp cada realizacion. Un vertadièr menaire…

Elèit 1: Carcassona balha un còp de man a Limós
 
Aquesta dimenjada, agèrem una jornada completa de campionat: es ja una informacion de primièra.
 
Fasiá pas caud dissabte de vèspre a Domèc per una partida seriosa e engatjada entre Carcassona e Avinhon. Los provençals tenon una plan bona esquipa, mas los Canaris se mostrèron solids en desfensa e mai realistas e prolifics en ataca per ganhar 30-8. Una victòria que fa los afars de Limós que ten a acabar la primièra fasa en quatrena posicion. Los Blanquetièrs esperaràn dissabte que ven un autre còp de man de Carcassona que reçaup lor autre concurrent dirècte: Vilanòva.
 
Dissabte, Lesinhan anèt ganhar a St Gaudenç 46-16, una partida ont i agèt un pauc tròp de trucs e patacs.
 
Dimenge, ploviá sus l’Agulha: un temps per tirons e granhòtas mas pas pels jogaires de rugbi que perdèron una palancada de palmas. Limós ganha 28-0 fàcia a Albi.
 
Los Dragonets van batre Palau dins lo dèrbi catalan: 36-14. Vilanòva se vei las pèiras per ganhar a Tolosa: 18-12.
 
Aquestes 17 e 18 d’abril, las tres formacions audencas reçaupràn: en cap d’aficha, Lesinhan-Dragonets. Carcassona jogarà dissabte al pè de Ciutat contra Vilanòva. Limós ensajarà de se remetre de la desfaita suspresa a l’anar a Tolosa. Avinhon-St Gaudenç e Albi-Palau completaràn lo programa.
 
 
Cup: Castleford ganha a la 100a minuta
 
En mai de la victòria dels catalans, d’autras partidas dels 8ns de Cup s’acabèron sus de marcas bèlas: Huddersfield elimina Leigh: 36-18; las formacions del Championship mesuran la diferéncia amb lo primièr escalon: Wigan bat York 26-0; Hull  FC domina Featherstone 34-14; Warrington daissa de miquetas a Swinton: 32-8; Salford es vertadièrament tròp fòrt per Widnes: 68-4.
 
Partida mai disputada entre St Helens e Leeds que los Sants ganhan: 26-18. Per contra, fàcia a Hull KR, Castleford egalizèt 32-32 amb un ensag non transformat just sus la còrna. Calguèt arribar a la quatrena sesilha de cinc minutas del punt en aur per que los Tigres s’impausèsson: 33-32.
 
Los quarts de finala se tendràn los 8 e 9 de mai. Los Dragons Catalans tornaràn trapar lors adversaris de la finala de 2018 a Wembley: los Lops de Warrington.
 
La finala es prevista pel dissabte 17 de julh a Wembley. Se coneis lo nom d’un absent segur dins las tribunas: lo prince Philip, qu’assistiguèt sièis còps al grand rendètz-vos. Dos còps i faguèt seguir la femna, la reina d’Anglatèrra. Ne sèm pas aquí de las preséncias del president de la Republica elisean (o de sa dòna) a una finala de la Copa Lòrd Derby!
 
 
Retorn a Brutus
 
Aqueste dissabte, los Dragons tornaràn trapar la pelena de Brutus amb la venguda dels Diables Roges de Salford. Seguirà la venguda de Warrington, lo 24, un biais de preparar lo quart de finala de la Cup, doas setmanas mai tard! Se caldrà contentar de seguir las partidas sus BeInSport, alara que los angleses parlan d’un possible retorn de public dins los estadis per mièg mai.
 
Los tolosans auràn pas lo plaser de tornar jogar a Ernèst Wallon aqueste dissabte 17, coma marcat al calendièr del Championship: vist que los Bròncos de Londres an decidit de venir pas en Occitània aqueste dissabte! Aquò farà una victòria 24-0 del TO pel classament!
 
 
NRL: los Vaquièrs meton los Tigres en gàbia
 
Parramatta se fa susprene sus sa pelena pels Dragons de Sant Jòrdi (12-26). Las Pantèras de Penrith, que dominan Canberra 30-10, se trapan sola formacion sens desfaita.
 
Dins la banlèga de Sydney, los Vaquièrs prenon las davants fàcia als Tigres per menar largament 28-6. Mas arriba al tigre nafrat de se reviscolar. Fin finala, los Vaquièrs ganhan lor primièra partida de la sason 34-30.
 
Aquesta fin de setmana, son de seguir de prèp los rescontres Melbourne-Polets (divendres) e Canberra-Parramatta (dissabte).
 
God save the Rugby League!
 
 
 
 
Alan Roch