Dimars d’aquesta setmana, a començat lo Ramadan, qu’ongan serà tornarmai atipic a causa de la pandemia de la Covid-19. E mai, dins aquel periòde del noven mes del calendièr lunar islamic, fòrça musulmans practiquen lo juni de l’alba al solelh colc, las activitats tradicionalas e religiosas d’aqueste periòde, qu’ongan s’acaba lo 12 de mai, son modificadas.
 
Aquela tradicion religiosa e festiva dels musulmans se deu adaptar a las mesuras sanitàrias coma lo cobrifuòc e la distanciacion fisica: son enebits, doncas, los recampaments del vèspre per pregar o manjar ensems. Dins aquel sens, las autoritats religiosas recomandan de far los repaisses del ser reduches al cercle familial. Las televisions de mai d’un país de majoritat musulmana retransmetràn en dirècte las pregàrias del ser. Tanben los comèrcis se devon adaptar. De costuma, cèrts comèrcis dobrisson durant la nuèch en temps de Ramadan, çò qu’ongan serà pas lo cas.
 
Es fòrça probable que fòrça mond de tradicion musulmana seguiscan pas las activitats del Ramadan dins aquelas condicions.
 
 
Juni de l’alba al solelh colc
 
Lo fach mai conegut del Ramadan es lo juni que practican los musulmans de l’alba al solelh colc. Las personas que lo vòlon practicar se devon absténer de manjar, de beure, d’aver de relacions sexualas, de fumar e de se pimponar fins al ser. O devon pas far las personas malautas, los enfants, los vièlhs, las femnas en periòde menstrual, las prenses e las qu’alachan lors enfants. L’ora de començar lo juni e l’ora de l’acabar dependon fòrça de la latitud, e cal consultar l’ora exacta de las pregàrias, dels junis e de l’Iftar: lo moment mai especial de cada jornada.
 
Los darrièrs jorns e l’endeman del Ramadan son de jorns de jòia, de portar de vestits nòus e de far de presents als mai pichons. S’agís d’una celebracion fòrça semblabla al Nadal tradicional occitan. Mas ongan aquela fèsta sembla que tanben se farà en comitat reduch.