Lo govèrn de Japon a anonciat qu’escampariá dins l’ocean Pacific l’aiga radioactiva comolada dins lo sit nuclear de Fukushima dempuèi l’accident de 2011. L’agéncia d’informacions Kiodo rapòrta que lo primièr ministre Yoshihide Suga a dich que “l’eliminacion de l’aiga tractada es un tèma inevitable del desmantelament del sit de Fukushima”, e a detalhat que se desvolopariá un plan per garentir la seguretat.
 
Amb aquela decision —qu’a levat de criticas fòrtas— Japon vòl metre lo ponch final al debat sus aquela aiga que se perdiá dins lo sit que sa capacitat maximala s’anava aténher en 2022. En setembre, s’èra emplit 1044 depauses amb 1,23 milion de tonas d’aiga radioactiva.
 
Lo procès començarà d’aicí a dos ans e lo govèrn del Japon prevei que pòsca durar de decennis. Una comission del ministèri de l’Economia, del Comèrci e e de l’Indústria concluguèt que las doas opcions viablas per resòlver lo problèma èran escampar l’aiga radioactiva dins la mar o l’evaporar. Considerèron que la primièra opcion èra la mai viabla, e la mesura recebèt lo sosten de l’Agéncia Internacionala de l’Energia Atomica (AIEA).
 
D’organizacions de la societat civila an mostrat lor chepic pel probable impacte environamental e los pescadors s’opausan a la decision per paur que los mercats refusen lo peis pescat dins la zòna. Lo president de la Cooperativa dels Pescadors de Japon, Hiroshi Kishi, a declarat que l’escampament èra “totalament inacceptable” e Greenpeace, de son caire, a dich que contraveniá “als dreches umans e als interèsses de la populacion de Fukushima, de Japon e dels autres païses de la region d’Asia-Pacific”.
 
 
De criticas dels païses vesins
 
Lo govèrn de la Corèa del Sud a criticat durament la decision de l’executiu japonés. Seol, qu’enebís dempuèi l’accident l’importacion de produches japoneses de la pesca, ara a menaçat d’un aument d’aquelas restriccions après l’escampament.
 
De son caire, China a exprimit son “grèu chepic al govèrn japonés per mejan dels canals diplomatics existents” e li a demandat que gerisca “l’afar d’un biais prudent e responsable”.
 
 
Sosten dels Estats Units e de l’AIEA
 
Per contra, segon los Estats Units, lo govèrn de Tòquio es estat “transparent” a tot moment e a adoptat de mesuras “confòrmas aparentament als estandards de seguretat en matèria nucleara a l’escala mondiala”.
 
A mai, lo director general de l’AIEA, Rafael Grossi, a saludat l’anóncia de Japon e a manifestat son sosten “per menar a bon tèrme un plan segur e transparent”.