Actualitats
Jutjaràn l’èx-dictator de Guatemala, Ríos Montt, per genocidi contra un grop maia
L’èx-cap d’estat, amb immunitat parlamentària fins arunan, deurà respondre per l’assassinat de 1771 personas del pòble ixil, al nòrd de Guatemala, fa trenta ans. Las organizacions dels dreches umans an celebrat que s’acabe l’impunitat que ne gaudissiá l’autocrata.
Lo jutge Miguel Ángel Gálvez faguèt istòria diluns passat, en Guatemala, en tot decidir de mandar al jutjament l’èx-dictator Efraín Ríos Montt, coma o soslinha la premsa guatemalenca. Gálvez considèra que i a pro d’indicis per far sèire Ríos Montt, dins sos 86 ans, sul banc dels acusats: Ríos Montt se deu explicar sus las responsabilitats qu’el, amb l’èx-general José Mauricio Rodríguez (que lo meteis jutge a decidit de jutjar tanben), an dins lo masèl perpetrat per l’armada de Guatemala, entre los ans 1982 e 1983; car pendent aqueles dos ans, 1771 personas del pòble ixil, un dels grops maias del nòrd del país, foguèron massacradas.
La decision es istorica perque, per lo primièr còp, un èx-cap d’estat guatemalenc deurà respondre davant la justícia per de presumits crimes comeses pendent son mandat.
Edgar Pérez, avocat de l’Associacion Justícia e Reconciliacion (AJR, una de las organizacions qu’avián fach lor denóncia contra Ríos Montt), disiá la setmana passada que i aviá pro de pròvas per menar l’èx-dictator al jutjament. Demest aquelas pròvas, i a de rapòrts de militars que qualifican las operacions militaras contra los ixils de “succès”, çò que provariá que lo masèl foguèt volgut pel regim.
L’avocat defensor de Ríos Montt, per contra, assegura que l’èx-dictator, en cap de moment, coneguèt pas los faches que li imputan. Sos avocats afirman que se pòt pas demostrar, de cap de biais, que Ríos Montt aguèsse determinat que los ixils èran “d’enemics” del regim guatemalenc.
L’AJR a celebrat la decision del jutge; e tanben o a fach Human Rights Watch, entitat qu’a soslinhat lo fach que, fa fòrça pauc d’ans, seriá estat impensable que l’autocrata aguèsse acabat als tribunals. De fach, lo procès contra l’èx-dictator es estat solament possible après que, arunan, s’acabèsse son immunitat parlamentària qu’aviá el coma deputat del Congrès guatemalenc.
Aqueste article ven del jornal catalan Nationalia.cat, amb qui Jornalet a un acòrdi de cooperacion.
Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.
Rhoooo... Mai era un tot pichon genocidi, que de tot biais lei maias li en aviá ja gaireben pas mai.
Qu'es aquò aquest anti-militarisme primari ?
Cal remembrar que lo Ríos Montt èra portat per doas cambas: l'una, una secta protestanta fanatica, que d'afogats de l'intolerància prestes a eliminar los qu'an pas la meteissa fe n'i a tanben entre los crestians; l'autra,lo govèrn des Estats Units de l'epòca que l'apiejava e li envièt fòrça conselhièrs militars.
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Escriu un comentari sus aqueste article
Senhala aqueste comentari