L’Assemblada francesa comencèt ièr de debatre lo projècte de lei que deu permetre lo maridatge e l’adopcion dels parelhs omosexuals. Amb aquela nòva regulacion, François Hollande a provocat de manifestacions de desenats de milièrs de ciutadans, tant contra coma en favor.

La dimenjada passada, las carrièras de París s’empliguèron per sosténer lo projècte de lei, en responsa a las manifestacions multitudinàrias de novembre en un dotzenat de vilas de l’Estat. La mobilizacion contra lo maridatge omosexual a estonat fòrça los analistas, en prenent en compte que, tradicionalament, l’estat francés es estat tolerant dins aquel sens. Mas los defensors de la lei son tanben de desenats de milièrs, e o demostrèron la dimenjada passada. “I a fòrça franceses qu’an volgut exprimir lor malcontentament e dire que n’an un sadol, d’aquela omofobia desinibida, de mai en mai visibla, qu’a sorgit en seguida del debat de la lei”, çò disiá lo pòrtavotz de l’organizacion Inter-LGTB, Nicolas Gouguin.
 
Los sondatges, qu’aquestes jorns prolifèran, dison que i a una majoritat de la populacion favorabla a la legalizacion dels maridatges omosexuals. Tanben es vertat que l’opinion apareis mai dividida quand se demanda son opinion sul drech dels omosexuals d’adoptar un enfant.
 
Lo govèrn del PS es convencut que la lei serà aprovada amb una majoritat larga, e mai se l’oposicion, que demandava un referendum prèvi, a presentat mai de cinc mila emendaments. Dempuèi ièr, los deputats an doas setmanas per debatre lo projècte, que se poiriá sometre al vòte lo 12 de febrièr.