Après fusilhar e tuar de manifestants amb de balas realas, la repression del govèrn putchista de Birmania va mai luènh. An publicat a la television d’imatges de joves detenguts, quatre dròlles e doas dròllas, amb la cara sagnosa e de marcas de torturas. Segon l’Associacion d’Ajuda als Presonièrs Politics d’aquel país (AAPP), s’agís d’una estrategia dissuasiva, per ensajar d’arrestar las manifestacions. L’AAPP se declara fòrça inquieta pels detenguts a causa de las toturas e sustot pr’amor que son en un endrech desconegut.
 
Los sièis joves son acusats d’aver lançat una bomba contra un bastiment governamental. Mas l’oposicion avertís que lo conselh militar que govèrna ara Birmania fa sovent de denóncias messorguièras.
 
E, malgrat la terror de la repression e un blocatge total de l’accès a Internet, las protèstas contunhan. Los manifestants revendican lo restabliment de la democracia e la liberacion dels detenguts. Dempuèi lo 1r de febrièr se compta almens 737 mòrts e mai de 3200 detenguts.
 
 
Crida a la comunautat internacionala
 
Lo Ret per la Documentacion dels Dreches Umans fa una crida a la comunautat internacionala per arrestar los abuses. Aquel ret internacional d’associacions umanitàrias enquista dempuèi 2014 sus las violacions dels dreches umans en Birmania e assegura que lo fach que l’armada mòstre dobèrtament aqueles imatges “es una pròva de la cruseltat”, una cruseltat deguda al fach “que dempuèi de decennis degun aja pas mes en question lors accions”.
 
De son caire, lo govèrn de Japon exigís la mesa en libertat d’un jornalista japonés de 45 ans que demòra en Birmania.
 

Emboldened through impunity This junta uses torture as its policy AAPP is concerned for all those detained particularly in undisclosed locations If international community does not act. Torture, and to death, will clearly continue pic.twitter.com/6pGU3tSVT3 — AAPP (Burma) (@aapp_burma) April 18, 2021