Dempuèi un an que se’n parlava, aqueste còp, i sèm. Anam triar. Pas las fedas mas los pacients. Coma los espitals los van pas poder aculhir a totes, van far la tria entre los malauts que van poder sonhar e los que demoraràn a lor ostal per i malautejar e i defuntar.
 
Que ditz tria ditz critèris de tria. Serà l’atge, l’espèr de vida de la persona, la color dels pelses, la color de la pèl, lo sèxe, la lenga parlada, la talha, la mena de malautiá, lo tipe d’operacion, la durada de l’espitalizacion, lo còst del sejorn...?
 
Cossí triar entre un enfanton amb un càncer que n’a per un mes a viure s’es pas operat e un adulte de quaranta ans que ven d’èsser pertocat per una ataca?
 
Cossí triar entre una femna blonda de trenta nòu ans amb una valva del còr de cambiar e una femna bruna de quaranta un ans amb una valva del còr d’arremplaçar?
 
Cossí triar entre un òme negre vièlh que ven d’infartar e un òme blanc vièlh que ven d’infartar?
 
Cossí triar entre una drolleta garrèla amb un càncer qu’a un mes a viure e un drollet garrèl amb un càncer qu’a quinze jorns a viure?
 
Puèi, se lo covidat deu totjorn passar en primièr?
 
Cossí triar entre un enfanton de cinc ans qu’a un mes a viure s’es pas operat e un vièlh de nonanta ans covidat?
 
Cossí triar entre una joveneta de vint ans que deu èsser operada lèu-lèu d’un càncer del sen e una femna covidada del variant anglés de seissanta ans?
 
Cossí triar entre un òme vièlh del pè gangrenat que deu èsser amputat e un jove de vint ans covidat desalenat?
 
Sèm un país talamai modèrne que dempuèi un an que rebalam la pandemia avèm pas capitat d’adaptar nòstre “sistèma” de santat. Que farián sens lo “sistèma”? Benlèu lo sistèma s’escana? Se s’escana, qual trabalha a l’escanar dempuèi d’annadas? Se caldrà esperar que siá escanat d’a fons per la covid per lo desescanar? Qual sap?
 
Per ara: “Tenètz-vos fièrs!”

 
 
 
 
Clamenç
umorista de lenga occitana



 
 
                          
            

fffff		fffff		fffff
	Lo confinament dels legeires de Jornalet
			Sès confinat a l’ostal? As, totun, de connexion a Internet? As de bonas idèas per passar lo temps? Jornalet demanda a sos legeires que partegen lors idèas e lor vida en confinament amb un messatge de tèxt, una fòto, un vidèo, un àudio o qué que siá que se pòsca publicar en linha e partejar amb los autres legeires. As bastit un castèl de carton pels enfants? Fas d’escalada dins la cosina? As organizat un concèrt per videoconferéncia? Tenes una vida sociala sus las fenèstras o los balcons? Fas d’espòrt a l’ostal? As de bons libres a nos recomandar? De bonas idèas per èsser tostemps de bona umor?
	Manda tos documents a info@jornale... Convivéncia e paratge en confinament.