La Lei Molac, de proteccion e promocion de las lengas regionalas e minorizadas de l’estat francés, se votèt e aprovèt fa doas setmanas a l’Assemblada Nacionala francesa e deviá èsser promulgada abans aqueste dijòus ser. Mas qualques oras abans la data limit de promulgacion, una seissantena de deputats, a títol individual, an depausat un recors al Conselh Constitucional.
 
“De qué an paur?”, çò se demandava Paul Molac suls rets socials. Lo deputat breton (Regions e Pòbles Solidaris) qu’es a l’origina d’aquela lei soslinha aquel “fach inedit”: remarca que “son de deputats de la majoritat que depausan un recors  al Conselh Constitucional contra una lei votada pel Parlament”. De costuma, d’efièch, son de parlamentaris de l’oposicion que sasisson aquela institucion. Molac se pausa doas questions: “De qué an paur? E perqué lo president de la Republica a esperat tan de temps per promulgar aquesta lei?
 
L’iniciativa dels deputats anti-Lei Molac  a provocat una reaccion de colèra de deputats bretons del meteis grop macronista de La Republica en Marcha, coma lo parlamentari Yannick Kerlogot, qu’a reagit sus Twitter amb l’etiqueta #KetGantMaAnv#PasEnMonNom.  En consequéncia, Christophe Castaner, lo president del grop, lor ditz dins una letra que “conven desenant d’esperar la decision del Conselh Constitucional, garent dels dreches e libertats fondamentalas”. Lo problèma seriá restacat al finançament de las escòlas, çò rapòrta France Bleu que mençona l’AFP.
 
 

Recours déposé au conseil Constitutionnel contre la loi sur les langues régionales : Mais de quoi ont-ils bien peur ?  pic.twitter.com/f0kMp5L1Xx

— Paul Molac (@Paul_Molac) April 22, 2021