L’astronauta francés format a Tolosa, Thomas Pesquet, es dins l’estacion espaciala internacionala (ISS) après son enaurament de Florida divendres passat. Dins sos 43 ans, Pesquet ven lo primièr europèu a comandar un veïcul espacial. L’astronauta fa partida de l’Agéncia Espaciala Europèa (ÈSA) e participa a la mission Alpha amb los representants de la NASA Megan MacArthur e Shane Kimbrough e lo japonés Aki Hoshide. La mission se pòt seguir en dirècte sul sit web de l’ESA.
 
Thomas Pesquet es encargat de nombrosas experiéncias pertocant la santat, mai que mai del cervèl, dont lo vielhiment de cèrtas cellulas per comprene la malautiá d’Alzheimer. Demest la centena d’experiéncias scientificas que menarà a bon tèrme sus l’ISS, una dotzena son estadas preparadas a Tolosa per la còla scientifica del Centre Nacional dels Estudis Espacials (CNES).
 
 
Ambaissador de l’ÒNU contra la fam
 
Lo 12 d’abril passat, l’Organizacion de las Nacions Unidas per l’Alimentacion e l’Agricultura (FAO) nomenèt Pesquet ambaissador de bona volontat de l’ÒNU.
 
Pesquet a trabalhat pendent longtemps amb la FAO per crear una consciéncia sus l’impacte del cambiament climatic sus l’agricultura e l’administracion intelligenta de las ressorsas naturalas. Desenant, Pesquet ajudarà a la FAO a far prene consciéncia de l’importància de transformar los sistèmas agroalimentaris del Mond per superar los enjòcs de la fam creissenta, e a preservar l’environament e la biodiversitat de la planeta.
 
Per luchar contra la fam, “cal lo sosten de cada individú e nos cal lo sosten de la sciéncia. Mas sustot d’accions. Thomas Pesquet nos prepausa una amira unica amb lo vejaire de l’espaci”, çò assegurèt lo director de la FAO, Qu Dongyu, a l’ora d’autrejar lo títol a l’astronauta. La fam es un malaür que creis. Segon Qu Dongyu, gaireben 690 milions de personas patisson la fam e la covid-19 poiriá apondre 132 milions de personas de mai a aquela chifra inumana.