Lo president dels Estats Units, Joe Biden, a reconegut coma tal lo “genocidi” que lo patiguèt lo pòble armèni de la man de l’empèri otoman pendent la Primièra Guèrra Mondiala. S’agís d’una declaracion sens precedent de part d’un president estatsunidenc dempuèi quaranta ans. “Cada an, a aquesta data, nos recordam de las vidas de totes los que moriguèron durant lo genocidi armèni de l’èra otomana e nos engatjam a evitar qu'aquela atrocitat tòrne passar”, çò ditz Biden dins un comunicat publicat a l’ocasion de la commemoracion del Jorn del Remembre d’Armènia que se ten lo 24 d’abril. “Onoram lor istòria. Reconeissèm lor dolor”, çò ditz lo comunicat.
 
La declaracion del president estatsunidenc a una portada extraordinària perque lo govèrn turc a totjorn refusat de reconéisser coma genocidi l’assassinat d’aperaquí un milion e mièg d’armènis dins los ans 1915 e 1916. De fach, una lei turca de 2007 enebís de parlar de “genocidi” e sosten que la populacion turca foguèt victima dels armènis. Segon la version oficiala, Turquia aviá paur d’una solidaritat crestiana entre armènis e russes pendent la Primièra Guèrra Mondiala, e amb aquel pretèxt reprimiguèron durament una revòlta dins la region de Van en abril de 1915.
 
Lo primièr ministre armèni, Nikol Paixinian, a mandat una letra a Biden ont lo merceja per sas paraulas e soslinha que son gèst mena a bon tèrme lo procès de reconeissença del genocidi armèni als Estats Units. En 2019, la Cambra dels Representants aviá ja reconegut lo massacre mas lo prononciament de Biden fa un autre pas endavant.
 
 
Reconeissença de França e Alemanha
 
En 2016, Alemanha reconeguèt lo genocidi dels armènis, en amodant una crisi amb Turquia. Mas França foguèt lo primièr país a aviar d’iniciativas per la reconeissença del genocidi,  quitament en assajant dos còps de ne penalizar la negacion, mas de badas, e se lo Parlament Europèu reconeis lo genocidi dempuèi 1987, qualques eurodeputats franceses ne son la causa.
 
La posicion francesa sus lo genocidi armèni se pòt explicar perque los armènis son nombroses dins l’Occitània jos administracion francesa, mai que mai a Marselha e Valença.
 
 
Lo genocidi
 
Lo 24 d’abril de 1915, las autoritats turcas arrestèron sèt cents intellectuals armènis a Constantinòple (uèi Istambol). Aquel jorn, conegut coma lo Dimenge Roge, marca lo jorn que comencèt lo genocidi d’aquel pòble de tradicion crestiana de la man del regim ultranacionalista dels Joves Turcs. En un pauc mai d’un an, se calcula que tuèron 1,5 milion d’armènis e que 850 000 d’eles foguèron desplaçats e menats a las infernalas Marchas de la Mòrt, de camps de concentracion alonhats de lors regions. Las minoritats assiriana e grèga de l’empèri tanben foguèron chapladas amb de centenats de milièrs de mòrts pendent aquel periòde. 
 
A l’ora d’ara, la memòria del genocidi se manten solament dins la jove Republica d’Armenia, nascuda en 1990 a partir del desmembrament de l’URSS, e dins los païses ont la diaspòra armènia es nombrosa, coma dins l’estat francés.