Aqueste dissabte 24 d’abril èra la primièra gròssa partida de la sason pels Dragons que recebián Warrington a Brutus. Los catalans dominèron la primièra mièja ora e marquèron un ensag transformat e una penalitat. Mas una escapada del talonaire anglés al ras del tengut e una diagonala al pè bonificadas en ensages transformats permetián als Lops de menar 12-8 a la pausa. Tre la represa, una intercepcion del centre Mamo li permetiá de marcar aprèp una corsa de 90 mètres, e de complicar lo prètzfach dels catalans. Los Sang e Aur trapèron pas cap de solucion per enganar la defensa anglesa e encaissèron un quatren ensag per pèrdre fin finala 24-8. E pensatz que caldrà tornar trapar aqueles lops de las dents longas d’aicí a quinze jorns en quart de finala de la Cup.
 
Entretemps, los Catalans tornaràn trapar los jogaires de Wakefield (divendres 30, a 7 oras del ser; partida retransmesa per BeInSport), qu’eliminèron fa gaire en 8n de Cup.
 
St Helens es l’autre venceire al defòra de la setmana (18-10 a Huddersfield) e ocupa lo cap del classament amb Wigan, alara qu’Huddersfield, Wakefield e Leigh an pas encara ganhat una partida.
 
 
Championship:Tolosa per intermiténcia
 
En Championship, aprèp lo refús de Londres de venir a Tolosa, es la partida contra Feathestone, prevista pel 1r de mai, qu’es ja anullada. Alara, per ara, los occitans seguisson lo calendièr de partidas previstas en Anglatèrra. Aqueste dimenge, jogavan a Halifax e s’impausavan 44-34.
 
 
Elèit 1: polit mes de mai e “sièis de mai”
 
En Elèit 1, la sason coneis un autre cambiament just abans la fin de la fasa de classament e las pelhòfas: a comptar d’aqueste 1r de mai, la règla de l’NRL e de la Superliga del “sièis tenguts de mai” per las fautas a l’entorn del tengut, coma precisions sus l’arrancatge de pauma en un contra un, entraràn en vigor. Va caler èsser en forma, qu’aquò vòl dire mens de temps per bufar e recuperar.
 
Aquesta dimenjada, lo calendièr èra en fasa de ratrapatge:
   
Aqueste dissabte 1r de mai, autra jornada de ratrapatge amb de flors de campanetas: se jogarà las partidas Lesinhan-Dragonets (decisiva per la segonda plaça), Carcassona-St Gaudenç e Vilanòva-Palau.
 
Dimenge 2 e diluns 3 de mai, 34 jogaires son convidats per Laurenç Fraissinós a Bordèu, non pas per una tasta de vins mas per un estagi de preparacion a la Copa del Mond de la tardor.
 
 
NRL: los Dògols sortisson los cròcs
 
Se Penrith signa sa setena victòria de la sason fàcia a Newcastle (24-6), los Dògols de Canterbury ne ganhan enfin una e, se vos plai, a l’exterior cò de las Làmias: 18-12.
 
 
 
 
Alan Roch