Lo recors dels 60 deputats contra la Lei Molac davant lo Conselh constitucional (CC) seriá “dirèctament teleguidat” pel gabinet de Jean-Michel Blanquer, çò rapòrta La Lettre A. La conselhièra parlamentària del ministre de l’educacion auriá pilotat la recenta sasina pels 60 deputats del CC contra cèrts articles del tèxt que defend la proteccion e la promocion de las lengas minorizadas.
 
La possibilitat de depausar un recors al CC foguèt establida per la lei en 1994 per favorir l’equilibri dels poders e donar a l’oposicion un esplech de contraròtle suplementari fàcia a l’accion del govèrn. Òr, La Lettre A soslinha qu’es “de tot en tot inedit qu’un recors dels deputats —e mai de la majoritat— emane, amb tota discrecion, del govèrn”.
 
Lo mèdia parla de “còp bas contra la democracia” e insistís sus aquesta contradiccion: “Lo secretariat general del govèrn deuriá assegurar davant lo Conselh Constitucional, coma o exigís la procedura, la defensa d’un tèxt atacat amb un sosmarin per un de sos ministèris”.
 
 
De signaturas raubadas
 
En mai d’aquò, lo blòg Être ou ne pas être bretillien assegura que cèrtas signaturas de deputats serián estadas raubadas sens lor consentiment. Se mençona lo cas de las deputadas Sophie Beaudouin-Hubière, Zivka Park e Florence Provendier.
 
 
 
 
 

---

De legir sus la tribuna de Nicolau Rei Bèthvéder - Lei Molac: Qué harà lo Conselh Constitucionau?