Al sègle XXn avián pas pro d’infirmièras e al XXIn sèm d’una manca grandarassa! Cal dire qu’al millenari passat las potingairas trabalhavan amb fòrça igiène mas amb gaire de gèl idroalcolic. Podiá arribar, pas totjorn, mas podiá arribar que te tirèsson la sonda d’urina, te faguèsson la fissada, t’ensaquèsson l’aspirina de Ròse dins la boca, te cambièsson lo botelhon de la perfusion sens se savonar las mans a cada còp. E passavan aital d’un pacient a l’autre. Se devián pas de longa alcolizar las mans tre que tocavan un malaut. Arrestavan pas de sonhar, atencionadas qu’èran a la santat de lors pacients.
 
Alara, perqué al sègle XXI, mancam tant d’infirmièras? Perqué? M’anatz dire que i a pas pro de plaças al concors? Benlèu... Son pas pro pagadas? Segur... mas es pas aquò! Es mai qu’aquò! Dempuèi la covid una infirmièra se lava las mans al mens vint dos còps per ora. Vint dos còps per ora amb de gèl idroalcolic. Per se netejar las mans plan coma cal, pas simplament se fretolhar los dets, cal doas minutas. Vint dos per dos, quaranta quatre minutas a se lavar las mans. Tres quart d’oras per l’igiène e un quart d’ora per sonhar! Cossí volètz qu’en un quart d’ora fagan lo trabalh que fasián abans en una ora? Me demandi cossí pòdon encara téner còp! D’aitan mai que las infirmièras se’n lavan pas las mans de lor trabalh! Son amanadas! Venir infirmièra per se lavar las mans? Compreni que n’i aja de mens en mens!
 
Nos caldriá quatre còps mai d’IDE. - d’Infirmièras Diplomadas d’Estat - o alara vestir aquelas qu’avèm d’una BPI, una Blòda de las Pòchas Idroalcolizadas. Benlèu coneissètz? Quora davalatz la man dins la pòcha de la BPI, una fina borra idralcolizada ven fretar dets e pauma dins un movement de davalamonta. Doncas, abans la piqura, las mans passan per las pòchas idròalcoolizadas, las PI. Aprèp la ponhedura, las mans passan tornarmai per la PI. Aital, son desinfectadas de longa. Avèm agut l’astre de testar aquelas blòdas novèlas. Per botar las doas mans dins la PI de drecha e la PI de senèstra e las tirar, cal trenta segondas. Quatre còps mens de temps que per se lavar las mans al butabuta de gèl classic. S’avián l’astre d’aver la BPI, las infirmièras amb de longa lo gèl a la pòcha, a portada de man, aurián tres còps mai de temps per poder apotingar lors malauts. Quin solaç per elas!
 
Pasmens, caldriá pas qu’aquelas BPI empachèsson de recrutar d’IDE que de besonh n’avèm tant !
 
 
 
 
Clamenç
umorista de lenga occitana



 
 
                          
            

fffff		fffff		fffff
	Lo confinament dels legeires de Jornalet
			Sès confinat a l’ostal? As, totun, de connexion a Internet? As de bonas idèas per passar lo temps? Jornalet demanda a sos legeires que partegen lors idèas e lor vida en confinament amb un messatge de tèxt, una fòto, un vidèo, un àudio o qué que siá que se pòsca publicar en linha e partejar amb los autres legeires. As bastit un castèl de carton pels enfants? Fas d’escalada dins la cosina? As organizat un concèrt per videoconferéncia? Tenes una vida sociala sus las fenèstras o los balcons? Fas d’espòrt a l’ostal? As de bons libres a nos recomandar? De bonas idèas per èsser tostemps de bona umor?
	Manda tos documents a info@jornale... Convivéncia e paratge en confinament.