Russia a decidit d’enebir l’intrada al president del Parlament Europèu, David Sassoli, a la vicepresidenta de la Comission, Vera Jourová, e a sièis autres nauts dirigents d’estats de l’Union Europèa. Aquela decision, Russia l’a presa après que l’Union Europèa sancionèt quatre foncionaris russes per l’encarceracion de Navalni.
 
Dins un comunicat conjonch, los presidents de las tres institucions de l’UE —Conselh, Parlament e Comission—, an condemnat la decision, que considèran “inacceptabla” e “desprovesida totalament de justificacion legala e de basa”. Segon Sassoli, Ursula von der Leyen e Charles Michel, lo vèto “ataca dirèctament l’Union Europèa, e non pas sonque los individús afectats”. L’UE se resèrva lo drech “de prene las mesuras apropriadas en responsa a la decision de las autoritats russas”, çò dison.
 
Sassoli, von der Leyen e Michel asseguran que lo vèto rus es una “pròva clara que Russia a causit la confrontacion amb l’Union Europèa en luòc d’acceptar de redreiçar la trajectòria negativa de las relacions bilateralas”.
 
Dins un tweet del 30 d’abril, Sassoli ironizèt sus la decision: “Sembla que soi pas benvengut al Kremlin. Me’n dobtavi.” A mai, soslinhèt que lo vèto empachariá pas que lo Parlament Europèu contunhèsse “de defendre los dreches umans, la libertat e la democracia”. “Las menaças nos faràn pas calar. Coma o escriguèt Tolstoi, i a pas de grandesa ont i a pas de vertat”, çò apondèt.