Lo debanament imprevisible del calendièr esportiu e las possibilitats de desplaçament entre Anglatèrra, Occitània e Catalonha complican la bona marcha de las competicions: Superliga, Championship e tanben lo campionat d’Elèit 1. La rason primièra n’es la covid e totas las mesuras sanitàrias, de confinhament, de possibilitat de desplaçament e de dobertura dels estadis… que l’acompanhan.
 
Atal, en Elèit 1, sus las tres partidas ja en retard que se devián jogar aquesta dimenjada se debanèron pas la partida bèla entre Lesinhan e Dragonets e l’afrontament Carcassona-St Gaudenç. Los Orses an encara 2 partidas de retard (Avinhon, Carcassona) e, per ara, demòra una sola data liura al calendièr!
 
Fàcia a d’angleses que pòdon o vòlon pas venir a Tolosa, lo TO va jogar qualques unas de sas partidas previstas a domicili en… Anglatèrra! E coma seràn eles que “recebon”, en mai del còst del viatge, auràn en carga totes los còstes de la partida (locacion estadi, servici medical…).
 
Las possibilitats de dobertura limitada e progressiva dels estadis al public va acompanhar tanben la seguida de las competicions. Vaquí l’afar, mas parlem puslèu espòrt!
 
 
Superliga: una trinitat per Tom Davies
 
A Wakefield, son pas mai Gats Fèrs mas Trinity. Lo club recebiá aqueste divendres de ser los Dragons Catalans. Los Sang e Aur dominèron lo primièr temps, marquèron 4 ensages, mas los angleses metèron a profièit doas decas catalanas per replicar: 20-12 a la pausa. Novèl ensag de Wakefield tre la represa. Pendent quasi vint minutas se demorèt sus aquela marca de 20-18, mas los catalans finiguèron mai fòrt en signant tres novèls ensages per ganhar 38-18. Suls 7 ensages marcats, l’alièr Tom Davies ne marquèt tres: cada còp, amb un cabuç de primièra al ras del bandieron.
 
Aquel divendres de ser, victòria al defòra tanben per St Helens (22-12) a Leigh e Castleford a Salford (28-18), alara que lo dijòus Wigan èra demorat mèstre sus sa pelena fàcia a Hull FC: 16-14 .
 
Wigan e St Helens an ganhadas las 5 partidas jogadas, alara que Wakefield e Leigh an perdut cada còp.
 
 
Los quarts de la Cup
 
Aqueste divendres e dissabte, plaça als quarts de la Cup. Totas las partidas se debanaràn a Leeds amb las oposicions:
   
 
Championship: Lo TO s’adapta
 
En Championship doncas, lo TO reçauprà dimenge los Vikings de Widnes sus la pelena de… Swinton. Lo mièg de Carcassona, Lucàs Albèrt (ex-Dragon) prendrà la direccion de la capitala occitana a la fin de la competicion d’Elèit 1.
 
Sens jogar, Tolosa se trapa en cap de classament en companhiá de Featherstone, la formacion qu’a pas desirat de faire lo desplaçament en Occitània aquesta dimenjada!
 
 
Elèit 1: los Bròncos atupits
 
Coma o avèm ja escrit, demorava pas qu’una partida de disputar pel 1r de mai e Vilanòva dominèt los Bròncos de Palau dins una partida a sens unic: 60-4. Al programa d’aqueste 8 de mai, se prepara un rescontre de tria a Carcassona amb la tenguda del dèrbi fàcia a Limós. D’oposicions qu’an totjorn un perfum particular e que los jogaires entamenan amb una motivacion fòrta.
 
Tres autras partidas son previstas aqueste dissabte: Dragonets-Avinhon, St Gaudenç-Vilanòva e Albi-Tolosa, alara que Palau reçauprà Lesinhan dimenge.
 
 
NRL: los Broncòs al triple galaup
 
Partida espectaclosa a Brisbane ont los Bròncos encaissan quatre ensages en tretze minutas (22-0) fàcia als Titans, mas ganhan 36-28! Las Pantèras de Penrith alinhan lor 8a victòria (28-16) fàcia a Manly.
 
Del divendres 14 al dimenge 16 de mai, las 16 formacions jogaràn lo Torn Magic (Magic round) a Brisbane. En esperant aquel brave rendètz-vos, los caps d’aficha del noven torn seràn Lapinons-Melbourne (dijòus 6), Parramatta-Polets (divendres 7) e Vaquièrs-Brisbane (dissabte 8).
 
 
 
 
Alan Roch