Un estudi de l’Institut de Metrica e d'Avaloracion de la Santat de l’Universitat de Washington (IHME) estima que los mòrts per covid-19 dins lo Mond entièr son aperaquí 6,9 milions, es a dire mai del doble de las donadas oficialas. Dins aquel sens, l’institut assegura qu’aquela estimacion se fonda sus dos factors: la manca de tèstes de diagnostic dins los primièrs meses de la pandemia e los grands excèsses de mortalitat que los an enregistrats fòrça païses.
 
“Malgrat l’aparéncia terribla de l’actuala pandemia de la covid-19, aquela analisi mòstra que la factura es fòrça pièger”, çò a explicat lo director de l’IHME, Chris Murray, que considèra qu’es fòrça important de comprene la valor reala d’aquelas donadas. “Aquelas chifras nos ajudan non solament a comprene l’amplor reala d’aquela crisi globala, mas nos balha una informacion preciosa sus las politicas de responsa e los plans de recuperacion”, çò a apondut.
 
Segon l’estudi, los Estats Units es totjorn lo país amb lo mai grand nombre de mòrts per la covid-19, mas la chifra reala de mòrts seriá de 905 289, e non pas los 574 043 oficialament comptabilizats. En segonda plaça se situariá Índia, actual epicentre de la pandemia, amb 654 395 mòrts, gaireben tres còps de mai que çò raportat.
 
Demest los quinze estats mai afectats i a lo francés, l’espanhòl e l’italian. França a raportat 105 506 decèsses, del temps que l’IHME ne calcula 132 680, çò es un 25,75% de mai. De son latz, semblariá qu’Espanha e Itàlia aurián pas comptabilizat lo 45% dels decèsses. Las autoritats italianas an assabentat de 121 257 decèsses del temps que l’IHME n’estima 175 832 ; las espanhòlas an enregistrat 85 365 mòrts, fòrça jos los 123 786 decèsses estimats per l’IHME.