Actualitats
Belkacem Lounés defen los toarègs d'Azawad
Se ditz hòrt estonat de las presas de posicions injustas d'EELV
Lo conselhèr regionau de Ròse e Aups Belkacem Lounés a defendut aquesta setmana lo movement toarèg de l'Azawad. D'origina berbèra e encargat de las lengas occitana e arpitana en Ròse e Aups, Lounés a reagit a un comunicat d'Euròpa Ecologia-Los Verds contra movement nacionau de l'Azawad (MNLA).
Despuish que lo movement nacionau de l'Azawad (MNLA) a des·hèit l'armada maliana e a provocat indirèctament un còp d'Estat a Mali, se son multiplicadas las reaccions internacionalas, sovent pro criticas cap au pòble toarèg. Quitament Euròpa Ecologia-Los Verds (EELV), un partit reputat defenidor de l'autodeterminacion deus pòbles, declarè lo 2 d'abriu passat que "los rebèls deu MNLA […] representan pas la populacion deu nòrd de Mali", afirmant tornar son "estacament a l'òrdi constitucionau e a l'integritat territoriau de Mali".
Belkacem Lounés, sòci de Regions e Pòbles Solidaris, encargat de las lengas occitana e arpitana en Ròse e Aups mes tanben sòci de la comission internacionala en aquera Region, a reagit a d'aqueth comunicat d'Euròpa Ecologia co-signat per la secretària nacionau Cécile Duflot, la deputada europèa Catherine Grèze, e Fadimata Toure deu partit ecologista malian. Se ditz hòrt estonat de la manca de coneishença de la realitat toarèg e de las presas de posicions injustas presas peu partit ecologista francés.
L'elegit d'origina berbèra bremba purmèr que lo problèma ei pas navèth e que los toarègs an pas jamèi acceptat la reparticion d'Africa deu nòrd en mantun Estats efectuada en las annadas 60 après la colonizacion francesa. Los toarègs qui demoran sus l'ensemble de Saharà claman despuish aquera data lo dret a l'autonomia. Shens responsa de la part de las autoritats qui gavidan aqueths territòris, an donc forçat la man au poder malian.
Segon Belkacem Lounés, au contra de çò de dit per Euròpa Ecologia, los toarègs de l'Azawad an pas cap ligam dab los islamistas, aquò ei "un amalgame entertiengut peus Estats per non escotar las reivendicacions toarègas. Au contra an pas jamèi deishat de demandar ajuda militara per hicar un tèrmi a la preséncia d'AQMI en territòri toarèg". Quant au ròtle supausat deus toarègs en la maquina repressiva deu regime de Muammar el Qadhdhafi, evocat per EELV, lo conselhèr regionau estima que los toarègs an efectivament balhat òmis a l'armada regulara mes qu'estón pas jamèi autorizats a deishar lo sud de Libia e que donc an pas jamèi participat a nada repression.
En conclusion a son comunicat, considèra que "lo saunèi deus toarègs ei pas de crear navèras frontèras mes de víver libres e respectats […] per preservar lor existéncia en tant que pòble". E puish qu'Euròpa Ecologia cita son "estacament au dret internacionau" dens son comunicat, Belkacem Lounés bremba qu'ei efectivament sus la basa d'aqueth principi que "lo monde libre sostiengó l'independéncia de numerós Estats d'Euròpa e tanben deu Sud-Sodan en 2011. Perqué refusar aqueth dret a l'Azawad? Ei per'mor Mali ei una anciana colonia francesa? A que corespon la concepcion deu dret deus pòble a geometria cambiadissa?" ce's demanda l'elegit regionau.
Matieu Casanòva
Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.
Belkacem Lounés es un tipe mai qu'interessent, discret, e que pren jamai la paraula per ren. Son comunicat es per io la melhora analisi qu'ai pòguda veire sus la situacion au Mali (en França dau mens), en mai de tornar botar Cecile Duflot a sa plaça, ela qu'a parlat un pauc viste, sens coneisser lo dossier. Volia tanben dire que la Region Ròse-Alpes es una de las regions la mai avançadas sus la question de las politicas linguisticas, quitament se de nòstres uelhs occitans totjorn virats devers lo Sud (e vist que la partida occitanòfone de la region es minoritaria) s'en rendem pas tròp compte. L'interes de Lounés es que es pas eissit d'une minoritat "regionala", mas d'una minoritat "fòra-exagonala", laidonc a reussit a universalizar lo discors sus las lengas minoritarias, en surtir de la logica "lengas regionalas" qu'es una apelacion faussa e ierarchisanta. Quauques occitans aurian de las leiçons a prener d'un berbère !
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Escriu un comentari sus aqueste article
Senhala aqueste comentari