Pecaire! Nòstras còlas de recèrca francesas son talamai ponchudas e an talamai de mejans per trabalhar, Sanòfi coma l’Institut Pastor e d’autres, qu’an pas capitat de far espelir un vaccin per s’aparar de la covid. Me diretz que los cercaires de tria an fugit França dempuèi un brave briu. I a que veire lo francés Bancel, benlèu un occitan, vengut patron de Modèrna Therapeutics als Estats Units.
 
Alara, sens vaccin, que podiam far per butar la carreta? Nos demorava l’embotelhatge! Que ditz botelhon ditz veire. Que ditz veire, ditz arena e arena de silici. N’anam mancar se contunham aital, alara perqué pas soscar a la capacitat del botelhon ? Perqué conten cinc dòsis e pas vint? Amb de botelhons de vint dòsis baissariam lo nombre de fiòlas. Del còp, consumariam mens d’arena de silici. Mas amb vint dòsis per botelhon escampariam pas de dòsis de vaccins? Ja qu’amb cinc dòsis nos arriba de n’escampar!
 
E puèi lo tap. Me diretz per fargar un tap cal pas èsser sortit de la cuèissa de ma Grand-la-Bòrnia! Mèfi! Es un tap que tapa sens tapar. Es a dire que, lo moment vengut, cal que laisse passar l’agulha sens laissar escampar de liquid. Aquí o cal dire, se nos i coneissèm pas gaire per fargar lo vaccin per se parar de la covid, en matèria de tap sens tapar i sabèm far! La pròva ? L’usina de Sant Egrèva en Isèra. Sens tapatge es campiona del tap pel botelhon.
 
Demòra de botar de liquid dins la fiòla. Demanda paciéncia e competéncia. Es pas tant aisit qu’aquò! D’efièch, cossí arribar a botar cinc dòsis sens ne botar sièis? Los americans i son pas arribats que per una fiòla prevista per cinc dòsis, ne botavan sièis o sèt. Se los franceses arribaràn a botar menimosament lo contengut de cinc dòsis dins un botelhon previst per cinc? Es pas segur! Se l’usina Delpharm en Eure e Loir capitarà de o far? Benlèu...
 
Aquela usina es la primièra qu’espelís en França. Se sabèm pas aprestar lo contengut, que lo saupèssem almens botar dins lo contenent. Es talamai espectaclós de botar un liquid dins una fiòla que lo President el meteis venguèt veire cossí far. Per mostrar tanben qu’en França sèm a la punta en matèria de lucha per la Covid. En punta al nivèl dels taps e dels botelhons! Aquel nivèl naut de recèrca scientifica justificava de segur lo desplaçament del President de la Republica. Pareis qu’aprèp aquesta usina, doas o tres seguiràn... d’autres desplaçaments presidencials son previstes...
 
Per qu’aquelas fabricas novèlas ajan de trabalh las annadas venentas demòra de desirar longa vida a la covid!

 
 
 
Clamenç
umorista de lenga occitana



 
 
                          
            

fffff		fffff		fffff
	Lo confinament dels legeires de Jornalet
			Sès confinat a l’ostal? As, totun, de connexion a Internet? As de bonas idèas per passar lo temps? Jornalet demanda a sos legeires que partegen lors idèas e lor vida en confinament amb un messatge de tèxt, una fòto, un vidèo, un àudio o qué que siá que se pòsca publicar en linha e partejar amb los autres legeires. As bastit un castèl de carton pels enfants? Fas d’escalada dins la cosina? As organizat un concèrt per videoconferéncia? Tenes una vida sociala sus las fenèstras o los balcons? Fas d’espòrt a l’ostal? As de bons libres a nos recomandar? De bonas idèas per èsser tostemps de bona umor?
	Manda tos documents a info@jornale... Convivéncia e paratge en confinament.