“Un còp èra, dins lo país, vivián lops e dragons; mas i a pas mai de dragons que los lops se los son manjats”. Aquò es pas un conte de ma grand la bòrnia, mas çò qu’advenguèt aqueste divendres de ser sus la pelena de l’estadi de Leeds. Catalans e Lops de Warrington se tornavan trapar pel compte del quart de finala de la Cup. La partida coneguèt la meteissa conclusion qu’en Superliga fa quinze jorns. Los catalans foguèron valents, mas gaire inventius. Los angleses, sens èsser formidables, marquèron dos ensages alara que los Sang e Aur passèron un sol còp la rega blanca. Desfaita 16-6 e adieu a un somiat retorn a Wembley.
 
Se qualifiquèron tanben: St Helens al tèrme d’una partida sarrada contra Huddersfield (23-18); Castleford tornèt batre Salford, mas calguèt anar al punt en aur (19-18); Hull FC eliminèt Wigan 20-10.
 
Sul camin de Wembley (17 de julh), lo 5 de junh, las mièjas finalas veiràn las oposicions: Hull FC/St Helens e Castleford/Warrington (los Tigres contra los Lops!).
 
Pels catalans, novèl viatge en Anglatèrra previst lo diluns 17 de mai per anar rescontrar Hull FC .
 
 
Championship: Tolosa torpilha lo drakar dels Vikings
 
Lo Tolosa Olimpic enregistra la signatura de l’èx-Dragon Tòni Gigòt que daissa sul pic Avinhon ont èra tornat jogar ongan. Aqueste dimenge, “a domicili” sus la pelena de Swinton, los Olimpians se joguèron aisidament de l’oposicion dels Vikings de Widnes, poguèron cantar lo Setanta que cante aprèp la victòria: 70-0.
 
 
Elèit 1: La jornada de las suspresas
 
Dins las règlas novèlas que seràn aplicadas per la Copa del Mond, la Federacion n’a causida 2 amb una mesa en aplicacion tre aqueste 8 de mai.
 
S’agís del “6 en mai”, ja a l’òbra en NRL e Superliga: una fauta de la defensa suls tenguts es pas mai sancionada per una penalitat, mas per la represa del compte dels tenguts. L’autra règla vòl clarificar las condicions d’arrancatge de la palma en un contra un.
 
A Domèc, Carcassona coneguèt sa primièra desfaita a domicili de la sason dins lo dèrbi, facia als vesins limosencs: 16-12! Mai espantant, a Sant Estève, los Dragonets se faguèron susprene per Avinhon (38-30). Logicament, Albi ganhèt fàcia a Tolosa: 48-24. Dimenge, Palau opausa una brava resisténcia a Lesinhan, mas pèrd: 30-40.
 
Pel tresen còp, St Gaudenç joguèt pas en rason de la covid. Es encara mai lo copacap per clavar la fasa de classament del campionat.
 
 
NRL: doble zèro per la novena jornada
 
En Austràlia, doas esquipas capitèron pas de marcar un sol punt e prenguèron de bravas brandidas: desfaita dels Lapinons, en mai d’aquò sus lor pelena, fàcia a Melbourne (50-0; sens comentari) , alara que Penrith passava un 48-0 a las Làmias.
 
Fàcia als Lapinons, l’alièr de Melbourne Josh Addo-Car foguèt lo primièr jogaire de l’istòria de l’NRL a puntar 6 ensages dins una partida.
 
Partida mai sarrada dins lo dèrbi de Queensland ont los Vaquièrs arrancan la victòria al punt en aur (19-18) fàcia als Bròncos.
 
A l’imatge de la Dimenjada Magica d’Euròpa, Austràlia coneis son Torn Magic (Magic Round) amb totas las partidas que se van debanar dins l’estadi de Brisbane:  
 
L’adieu a un tretzista
 
Clavarem aquesta cronica amb una pensada bèla pel Robèrt Martí que, dins sos vestits de Padena, portava los debasses d’Albi 13. Tot naturalament, balhèt son testimoniatge per la publicacion de 13 coma rugbí (IEO-Descobèrtas, 2000) en pausant 13 questions a son doble, lo Marcelon de Padena:
 
“Un esportiu se deu de susvelhar çò que manja, per exemple pas de Mac Dò, mas al contrari de causas equilibradas: confit d’auca a las castanhas e adòba amb de milhàs dins la setmana, e lo dimenge, abans la partida, salsissa a l’òli amb d’aligòt e bravament d’alh dins l’aligòt. Atal, quand ròtas, la mesclada advèrsa s’estavanís. L’alh fa ben çò qu’a a far!”
 
 
 
 
Alan Roch