La sindica d’Aran, Maria Vergés, a demandat per letra una reünion amb la presidenta del Parlament de Catalonha, Laura Borràs, per tractar dels afars d’importància per Aran, çò rapòrta lo Conselh General d’Aran. L’institucion d’autogovèrn aranesa revendica sa participacion a totes los afars legislatius que pertòcan la Val d’Aran, coma o estipula l’Estatut d’Autonomia de Catalonha. A mai, Vergés vòl rescontrar los representants dels partits politics del Parlament de Catalonha per lor expausar los enjòcs del país occitan de cap de Garona.
 
 
Pas de govèrn a la Generalitat de Catalonha
 
Mentretant, lo Parlament de Catalonha a pas encara pogut elegir un nòu president de la Generalitat après la malescasuda de las negociacions entre los dos principals partits independentistas. Las eleccions se tenguèron lo 14 de febrièr passat e lo resultat mostrèt una gaireben tripla egalitat entre las doas principalas fòrças independentistas d’Amassa per Catalonha (JxCat) e d’Esquèrra Republicana de Catalonha (ÈRC) e lo Partit Socialista (PSC) qu’aviá fach campanha per l’unionisme. Mentre que s’ensaja d’acòrdis de darrièra minuta, la possibilitat d’un retorn a las urnas se sarra.



 

Era sindica d’Aran a sollicitat ua trobada damb era presidenta deth Parlament de Catalunya entà tractar sus ahèrs d’importància tà Aran e sus era participacion deth Conselh Generau en totes aqueres iniciatives legislatives qu’afècten ara Val d’Aran: https://t.co/fMdPFBM9nlpic.twitter.com/mqlMnB61Jj

— Conselh Generau d'Aran (@conselharan) May 10, 2021