Almens 24 personas, dont 9 enfants, son mòrts en Gaza en seguida dels bombardaments de l’armada israeliana, dins la nuèch de diluns a dimars. Los comandaments militars an justificat l’operacion en assegurant qu’es la responsa als mai de dos cents projectils que los an lançats de militants d’Hamas e del Jihad Islamic de Gaza estant. Abans, las doas organizacions avián exigit lo retirament de la polícia israeliana de l’Esplanada de las Mosquetas.
 
L’escalada militara es la darrièra estapa de tensions que quitan pas de créisser dempuèi qualques jorns. Aquesta setmana, la Cort Suprèma israeliana deviá anonciar son verdicte sus l’expulsion de divèrsas familhas palestinianas del quartièr de Sheikh Jarrah de Jerusalèm, ont fa de decennis qu’i demòran, per que lors ostals foguèsson ocupats per de colons josieus.
 
Fin finala, lo tribunal a reportat lo verdicte, mas dempuèi qualques jorns i a de protèstas dins los airals majoritàriament arabis d’Israèl e dins las zònas ocupadas de Cisjordania. Totun, la situacion faguèt una virada diluns quand la polícia israeliana assautèt l’Esplanada de las Mosquetas —lo tresen luòc mai sagrat del mond musulman— e lancèt de gases lacrimogèns contra las personas que pregavan dins la mosqueta d’Al Aqsa.
 
L’operacion policièra, que comportèt la militarizacion de tot lo centre istoric de la vila, se faguèt justament dins lo dich Jorn de Jerusalèm, ont los israelians commemòran la fin de la Guèrra dels Sièis Jorns e l’ocupacion de l’èst de Jerusalèm. Diluns, las celebracions s’acabèron amb una manifestacion ultranacionalista, que fin finala traversèt pas l’èst de Jerusalèm coma èra previst.
 
Los afrontaments amb la polícia s’estendèron tanben a d’autres ponches coma Ebron, e daissèron mai de 300 personas nafradas.