Compausat de militants sortits de totas las estructuras clandestinas actualament inactivas, lo grop armat anóncia un “redesplegament tactic”, a l’espèra que “l’estat francés engatge un vertadièr procès politic pr’amor de reglar la question nacionala còrsa"

45 ans exactament après la creacion del Front de Liberacion Nacionala de Corsega, lo 5 de mai de 1976, la fondacion d’un novèl grop armat, nomenat “FLNC Maghju 21” (FLNC M21) es estada anonciada dins una conferéncia de premsa clandestina.
 
An fach conéisser lors revendicacions 8 personas armadas de fusilhs mitralhadors e de pistolets, las caras escondudas jos de cagolas e tot vestits de negre, dins la drecha tradicion de l’FLNC, que lo novèl movement se’n presenta coma un eiretièr.

 
Un messatge adreiçat a l’estat francés e a Pè a Corsica
 
Los membres de l’FLNC Maghju 21 (M21) remarcan que “ges de gèst significatiu /.../ cap a una solucion politica del problèma còrs” es pas estat prepausat dempuèi la pausa de las armas anonciada en junh de 2014. Planhon que “l’estat francés [aja] pas jamai alestit un vertadièr transferiment de sobeiranetat devèrs Corsega coma es lo cas per totas las autras illas de Mediterranèa dempuèi de decennis”, malgrat l’accession al poder dels independentistas en 2015.
 
“Sola una adaptacion pietadosa, sens poders politics vertadièrs es considerada, jol contraròtle del parlament francés e de l’inflexibla Constitucion francesa”, çò apond la declaracion d’intencion del movement. Lo resultat n’es que “la situacion es blocada e Corsega se trapa a un caireforc”, çò ditz encara lo grop armat qu’exigís tanben la liberacion immediata de totes los presonièrs politics.
 
Aquesta situacion seriá tanben lo resultat de la malastrada de la politica menada per la coalicion nacionalista Pè a Corsica (Per Corsega), que dirigís la collectivitat  territoriala de Corsega dempuèi decembre de 2015, çò diguèron tanben los orators de l’FLNC M21.
 
La coalicion, qu’amassa Femu a Corsica (Fagam Corsega), lo PNC (Partit de la Nacion Còrsa) e Corsica Libera (Corsega Liura), se seriá, segon lo grop clandestin, mai ocupada de gerir la collectivitat puslèu que de bastir una nacion qu’impausèsse un vertadièr rapòrt de fòrça fàcia a l’estat francés. De mai, per “çò que podián far, son pas estats capables de respondre coma caliá, coma suls dorsièrs del tractament de las escobilhas e del transpòrt maritim.”
 

“Corsega es en dangièr”
 
Darrièr ponch de l’analisi del grop clandestin: se planhon que Corsega siá uèi en perilh e la veson coma un batèu fòl. Delà la gestion cortermista, i a tanben la cobesiá dels grops financièrs qu’acaparan los sectors estrategics amb l’aprobacion de l’estat e lo silenci dels elegits locals. Tant los monopòlis dins los transpòrts coma la vida cara son d’exemples qu’entraïnan la creissença de las inegalitats e de la misèria d’un latz, del temps que, d’autre latz, una minoritat s’enriquís. Las consequéncias son grèvas e lo grop crenta lo desvolopament d’una grangrena mafiosa a travèrs de la venda de dròga que seriá a se generalizar sus l’illa e qu’entraïnariá l’aument de las violéncias contra totes los ciutadans, quitament los trabalhadors e los patriòtas. Enfin, lo grop denóncia l’especulacion immobilièra que fa montar los prèses e empacha los còrses d’accedir al lotjament.

 
Una crida al vòte nacionalista
 
Pr’aquò, malgrat la constatacion que la “lucha institucionala”capita mal, l’FLNC M21, que sembla de voler tornar prene las armas, crida los ciutadans de l’illa a contunhar de votar pels partits nacionalistas, que deuràn, de lor costat, clarificar lor messatge e tornar a lors basas ideologicas: “la reconeissença dels dreches istorics del pòble còrs”.





 

Corse : le parquet antiterroriste saisi de l'enquête sur la création du groupe armé "FLNC Maghju 21"

→ https://t.co/qNZSnSRTZmpic.twitter.com/bAu1yo4mEm

— France 3 Corse (@FTViaStella) May 10, 2021