En mai de las chainas TV classicas francesas, TV9 Mercantour la chaina de television locala de las comunas de Tiniá Auta e de las estacions dal Parc dal Mercantorn ven de lançar la dubertura dal siu sit web de TV9 Mercantour.
 
Vòlon desvelopar lor activitat e sus lor sit se pòt, en mai de tornar veire los vidèos e fòtos de las activitats de las estacions alpenchas coma las activitats de nèu de Sant Dalmas lo Selvatge, descubrir la vita socio-culturala dals vilatges de Tiniá Auta, far de visitas de vilatges, aver d’ideas d’escorreguás en totas sasons, apréner de recèptas de cosina coma tornar consultar lo magazine setmanier de TV9 Mercantour: “Le quoi de 9”.
 
Per lo moment, deguna emission en occitan ò cronica en occitan es prevista. Es benlèu lo moment de lor prepausar. Chal sinhalar que l’occitan es ancara parlat al quotidian per una bòna part de la populacion permanenta de Tiniá Auta, tant dins las vilas coma dins los vilars.
 
En complement de las ràdios francesas francofònas, l’ofèrta mediatica regionala es establa en Gavotina de las Alps Marinas e de las Alps de Provença Auta. Ràdio Oxygène (implantaia dins las grandas estacions de las Alps dal Sud dal Mercantour al Val d’Isèra) que faguèt un temps una emission en occitan “Sèm encara aicí” es captabla sus la benda hertziana de La Còla Miana (La Colmiane, val de Blora), a Auron (Val de la Tiniá) en passar per Valberg (valaia dals Chans e de Var) e tanben dins los departiments de las Alps de Provença Auta, las Alps Autas, l’Oesen e lo Vercòrs. Aquela ràdio es de lòng en recercha de collaborators per animar de cronicas. Ràdio Grimaldi FMcontunha las sius activitats radiofonicas de proximitat entre Vilars de Var, Daluís, Poget Teniers (valaia de Var) e Anòt, Mialhas (valaia de la Vaira). Ràdio Fréquence K (K coma Carròs) emete despí Carròs (bassa valaia de Var) sus la riba de mar fins al país mentonasc e fins al començament de las valaias d’Esteron, Vesubiá e Tiniá. De notar la siu emission bilingüa francés-occitan Raggapero.
 
Al nivèl dals mèdias papier, en demai dals grands quotidians franceses e dals quotidians regionals francofònes pertejats per Nice Matin (edicion valaias) e La Provence, demòran lo jornal mesadier bilingüe dal País mentonasc e entorns Ou Païs Mentounasc baileiat per la Societat d’Art e d’Istòria dal País Mentonasc, lo jornal mesadier de Vesubiá e dal Val de Blora Lou Vesubian que parla de las actualitats en valaia de Vesubiá e valaias entorn amb ocasionalament una rubrica en occitan gavòt (ò mesclat de niçard) per d’autors d’aquela valaia. Lo magazine generalista gratuït que cuerbe una bòna part de Gavotina Alman’Alpes pareissent cada dos meses confirma lo siu desvelopament ambé de ligams e de nòvas originals. Lo jornal mesadier bilenga niçard Lou Sourgentin a una rubrica  en occitan gavòt Païs Gavouòt e ocasionalament d’articles tràctan de Gavotina de Contea (Comtat de Niça).
 
Enfin, lo jornal Le Haut Pays jornal de Ròia-Bèura (Bévéra) al revenge sembla d’aver cessat las sius activitats.
 
La soleta alternativa per aver de mèdias globals en occitan rèsta totjorn l’Interret ambé Ràdio Nissa pantai  coma ràdio regionala occitana ambé d’emissions en niçard e gavòt, e autrament los mèdias occitans que cuèrbon d’autras regions e Occitània tota: Dètz TV per la vidèo e Jornalet  coma La Setmana per l’escrich.
 
 
 
 
Laurenç Revèst