Pels que se fretavan ja las mans de contentament d’aver pas de cronica tretzista aquesta setmana dins Lo Jornalet, serà una brava decepcion. Avèm just retardat d’una jornada sa publicacion en rason dels rescontres de la Superliga que, per un còp, se debanavan un diluns de ser. Mas comencem pel campionat del país.

Elèit 1: lo temps s’atruma pels primadièrs
 
La fin de la fasa de classament se complica pels caps de fila. Lo primièr, Carcassona, va arrancar la victòria, malgrat un jòc estequit, a Tolosa 20-12. Los Dragonets catalans coneisson lor segonda desfaita de seguida en perdent del costat de Vilanòva: 22-8. La partida de dissabte qu’arriba a Lesinhan determinarà lor plaça al classament entre segonda e quatrena plaça.
 
Per ara, l’esquipa de Corbièras ocupa la segonda plaça. Aqueste dimenge, lo responsable del planchòt al Molin patiguèt d’una rampa amb totes los punts qu’agèt de notificar per una partida vodada a l’ofensiva: Lesinhan: 54 - Albi: 26.
 
Limós, qu’a jogat totas sas partidas, es per ara tresen aprèp una victòria aisida dissabte fàcia a St Gaudenç: 62-12.
 
Per lor darrièra partida de la sason, los palauencs opausèron una brava resisténcia sus la pelena d’Avinhon: desfaita 24-40.
 
Autra partida en retard de jogar aqueste dissabte 22: Avinhon-St Gaudenç. Per clavar lor sason e, a l’encòp, per menar a bon tèrme lo debanament de la fasa de classament, demoraràn encara doas partidas de jogar als Orses: lo dimècres 26 (!) a Carcassona, puèi a Vilanòva a la fin del mes.
 
La federacion a anonciat que la finala se tendriá a l’estadi Ernèst Wallon, mutualizat entre l’Estadi Tolosan (XV) e lo TO (XIII), lo dimenge 20 de junh.
 
 
Championship: Lo TO daissa pas res passar
 
En Championship, novèla victòria larga del TO en Anglatèrra e tornarmai sens encaissar un sol punt: Whitehaven encaissa un 66-0! Los occitans tornaràn en Anglatèrra dissabte per jogar una novèla partida “a domicili” contra Swinton qu’es en fons de classament e que ne tremòla ja!
 
 
NRL: resultas logicas pel Magic Round
 
L’estadi de Brisbane recebiá de divendres a dimenge las 8 partidas del Magic Round.
   
 
La Superliga jòga lo diluns e los Dragons ne profièitan
 
Se Leeds batèt Wakefield en prolongacion 15-13 divendres de ser, las autras 5 partidas de la 6a jornada de la Superliga se tenián aqueste diluns de ser.
 
Los Dragons rescontravan Hull FC davant los cinc milierats d’espectators autorizats. A la pausa, las doas esquipas èran a egalitat: 4-4. Los catalans passèron a la velocitat superiora dins lo darrièr quart d’ora ont puntèron tres ensages per ganhar 27-10.
 
Van seguir doas partidas bèlas a domicili pels Dragons. Actualament tresens al classament, van reçaupre los primièrs dos qu’an pas encara perdut una sola partida : seràn a Brutus Saint Helens aqueste dissabte 22 e puèi Wigan lo dissabte 29 de mai.
 
 
 
Alan Roch