Divendres 21 de mag, eths escolans de 6u deth collègi Émile-Paul Vayssié qu’avián un arrendetz-vos important a aunorar ath espaci Sent Miquèu d’Aurinhac: eth concèrt “Canta, gafet!”. Aqueth projècte pedagogic, començat en seteme, qu’a federat quate escòlas (Sent Marcèth, era Toa, Castilhon de Sent Martòri, Francon) e donc eth collègi deth sector. Concretament, cada establiment qu’a trebalhat sus un arrepertòri a basa de cançons tradicionalas e de creacions, en encastre deths programas d’occitan e d’educacion musicala. Eths gafets que devián inicialament prénguer part a dus concèrts ath primtemps mès, pr’amor dera crisa sanitària, n’é cap estat possible. Qu’é donc estat decidit de procedir a captations vidèo en cada establiment. Eths collegians qu’interpretèren siés cançons, duas tradicionalas (La Molièra, Aqueras Montanhas) e quate creacions: Lo còr que’m pataqueja (Nadau), Ensalada (Arredalh), Sò jo (Alidé Sans) e Camina (Guilhèm Surpas, un artista de Perigòrd qu’èra vengut ath collegi nà rencontrar-les, eth 7 de mag). Aqueras cançons, que son prumèr estadas estudiadas en cors d’occitan, eth çò qu’a permés aths dròlles d’aprénguer eras chifras, eths dias dera setmana, eras partidas deth còs… Après, eth cant qu’é estat trebalhat en educacion musicala. Acompanhats per dus musicians, Pierre Rouch (acordeon diatonic) e Eric Marilleau (percussions) e enquadrats peths sòns professors d’educacion musicala, d’occitan e de francés, eths joesis cantaires que heren pròva d’un brave estrambòrd. Après, qu’escotèren ua conferéncia musicala de Pierre Rouch, qu’é tanben factor d’instruments. Que les presentèc eths diferents tipes d’aboèses e de bodegas deths dus costats deths Pirenèus, deth País Basco ara Catalonha, sense desbrembar era Occitània. Après plan de trebalh tota era annada e fòrça peripècias aquestas darrèras setmanas, eth projècte que’s podec finalament concretizar: ua polida recompensa nà totis eths participants!
 
 
 
 
Joan Pau Ferré



 

fffff		fffff
	Jornalet a l'escòla Jornalet a una seccion especifica sus l’escòla occitana. Nos agradariá fòrça que las escòlas, que sián de Calandretas o d’escòlas bilingüas, poguèsson emplenar elas meteissas aquesta seccion amb de nòvas, e que los quites escolans las poguèsson redigir en explicar los faches que fan l’actualitat dins cada escòla: una excursion culturala, la vesita d’una personalitat, una fèsta populara amb los parents, una competicion esportiva, etcetèra. Evidentament, las fotografias, los enregistraments o los imatges de vidèo seràn tras que benvenguts, se n’i a.  Se cada escòla nos manda quatre o cinc nòvas per an serem plan contents e satisfaches. Pensam que pòt èsser un bon ponch d’amassada per la comunautat educativa occitana, una iniciativa interessanta pels escolans e un esplech de socializacion lingüistica per las familhas dels escolans. Esperam de poder comptar amb lo vòstre sosten, e esperam que Jornalet serà una aisina utila per las escòlas occitanas. Mandatz-nos las vòstras nòvas a info@jor…