Lo Joves Europèus de Tolosa denóncian, dins un comunicat en occitan, d’empediments de la comuna de Perpinhan per menar a bon tèrme lors accions dins l’encastre d’un rescontre amb la Joventut Europèa Federalista de Catalonha. Los joves europeïstas de la Ciutat Mondina e los catalans avián organizat una tièra d’activitats dins aquesta dimenjada de Pentacòsta restacadas amb l’identitat catalana e l’Union Europèa, çò que sembla d’aver pas agradat a las autoritats d’extrèma drecha que govèrnan ara Perpinhan. Denóncian un mancament a la libertat de manifestacion.
 
Après l’enebicion per la comuna de l’accion per carrièras, los joves europeïstas an reüssit a completa lor programa, amb de vesitas dels memorials dels camps de refugiats que fugiguèron lo faissisme de l’estat espanhòl en 1939.
 
Los joves foguèron tanplan aculhits a la delegacion nòrd-catalana de la Generalitat de Catalonha. “Volèm entamenar l’afrairament entre la seccion de Tolosa e de Barcelona per d’autres eveniments, mai que mai en memòria de l’exili republican”, çò a dich a la redaccion de Jornalet lo vicepresident dels Joves Europèus de Tolosa, Michel Boris Mandirola.