Dempuèi quasi una annada, òm se desolava de poder pas metre un pè, quitament pas un artelh, dins los estadis. Badàvem cada fin de setmana davant las retransmissions de las partidas NRL amb los estadis australians tornats a una frequentacion normala.

Las novèlas mesuras sanitàrias permetèron als catalans de jogar davant 5500 espectators a Hull diluns passat e de dobrir las pòrtas a 1000 personas dissabte a Brutus. D’espectators tanben a Avinhon per la venguda de Sent-Gaudenç e al Molin per la partida bèla entre FCL e Dragonets.
 
Las mièjas finalas e la finala del campionat poiràn reçaupre 5 000 espectators. Una estapa novèla serà passada quand los estanquets tornaràn dobrir per poder tornar jogar las partidas en gèstes e paraulas fins a l’infinit!
 
 
Superliga: los Dragons diabolics pels Sants!
 
L’espòrt es pas una sciéncia exacta. Vaquí los Dragons que pèrdon a l’escalfament dos jogaires clau: l’arrièr Sam Tomkins e lo centre Langi. Son obligats de titularizar los joves Artur Morgue a l’arrièr e Matieu Laguèrra al centre. La diferéncia se vegèt pas que los Sang e Aur capitèron a jogar en grop seriós, en particular en defensa. Dins lo primièr temps, lo dobertura Maloney marquèt una penalitat puèi transformèt son ensag: 8-2 pels catalans a la pausa.
 
Dins lo segond temps, los Sang e Aur marcaràn dos còps: sus una palma perduda anglesa pel centre Whare, puèi amb una ataca d’un desenat de passas que traversèt dos còps la largor del terren abans de mandar Benjamin Julien darrièr la rega blanca. Dins las darrièras minutas, los Dragons resistiguèron al retorn anglés per gardar l’avantatge 20-16.
 
Dissabte, serà la darrièra esquipa qu’o a tot ganhat en Superliga que vendrà a Perpinhan: Wigan. Aquò promet!
 
 
Championship: Novèla passejada anglesa pel TO
 
Lo Tolosa Olimpic jogava dissabte una partida de mai “a domicili” cò de son adversari del jorn: Swinton. Los angleses tenguèron pè fins a la pausa (24-18 pels tolosans), puèi la fòga dels vesins de Garona los emportèt: victòria occitana 66-18.
 
 
Elèit 1: Lesinhan, dalfin de Carcassona
 
Ambient de fasa finala aqueste dimenge a Lesinhan ont l’FCL recebiá los Dragonets amb la segonda plaça, qualificativa dirècta per las mièjas finalas, coma enjòc. La partida tenguèt totas sas promessas e demorèt indecisa fins al còp de fiulet liberator. L’indisciplina dels joves catalans permetèt a Marginet de passar las penalitats que balhan una corta victòria 22-20 e la segonda plaça als audencs.
 
La tresena desfaita en seguida dels Dragonets los daissa quatrens, just darrièr lo tresen club audenc: Limós.
 
Dins una quinzenada, los barratges opausaràn doncas Limós a Vilanòva e los catalans tornaràn trapar Avinhon.
 
Encara doas partidas de jogar per clavar la primièra fasa. Dissabte, St Gaudenç pausèt de problèmas a Avinhon pendent una ora abans de plegar: 52-30. Demòran encara als Orses de jogar per l’onor aqueste dimècres a Carcassona e dissabte a Vilanòva.
 
 
NRL: Sin Bin fa lo plen…
 
L’NRL e los arbitres fan la caça als placatges nauts e multiplican las expulsions per dètz minutas e las mesas suls rapòrts que menaràn a passatge davant la comission de disciplina. Se va caler acostumar a se baissar e a tornar placar a las cambas!
 
Las Pantèras de Penrith, cap de fila sens desfaita, manjan tot cruses los Lapinons: 56-12.
 
 
 
 
Alan Roch