Del 3 al 5 de junh que venon se tendrà la 13a edicion del prèmi Ostana, escrituras en lenga maire, que normalament guierdona los activistas de las lengas minorizadas. S’agís d’un grand eveniment, menat a bon tèrme per la Chambra d’Òc e qu’es vengut tot un festenal de la biodiversitat lingüistica.
 
L’edicion d’ongan vòl èsser una “reflexion suls dreches lingüisics” amb un agach especific sus d’idèas e d’accions al servici de las lengas.
 
 
Edicion en partatge
 
L’eveniment se debana totjorn a Ostana (Val Pò), mas ongan, coma l’an passat, la situacion de la pandemia complica los viatges. Per tant, aquesta tretzena edicion del prèmi Ostana serà un còp de mai retransmesa en dirècte sus Internet, “jos la bandièra del partatge”.
 
Fins ara, lo prèmi Ostana, escrituras en lenga maire, a mes a l’onor 44 lengas dels 5 continents: albanés de Kosova e d’Itàlia, amazigh de Cabilia, armèni, basco, breton, catalan, chovash, cimbri, cornic, creòl capverdian, curd, ebrieu, eslovèn, even, friolan, frison, gaelic irlandés, galèc, galés, grecocalabrés, guaraní, huave, innu, ioruba, ladin, maltés, maòri, mazatèca, navaho, neonorvegian, occitan, ròm, romanch, sami, sarde, sheiene, shuar, tibetan, totonaca, walser e las minoritats oralicas de Russia e karenicas de Birmania e Tailàndia.
 
La majoritat d’aquelas lengas las poiretz ausir dins l’emission dels 3, 4 e 5 de junh. Per mai d’informacion sul programa e seguir l’emission, cal vesitar lo sit premioostana.it.