Dempuèi lo 24 de mai, los usatgièrs de la gara de Bordèu an jols uèlhs d’afichetas amb de mots en francitan. Son qualques unes dels elements d’una campanha de sensibilizacion que se farà pendent sièis meses a l’escala de las regions dichas Nòva Aquitània e Occitània.
 
Aquela campanha se presentèt lo 26 de mai a la premsa per l’intermediari de sa presidenta Charline Claveau. En mai de Bordèu Sent Joan, aquelas afichas seràn pausadas dins 52 garas de las doas regions. Aquò serà completat per una campanha en linha (objectiu: 800 000 vistas) e d’un sit Internet (jemejettealoc.com) destinat a remosar totas las ressorsas e donadas disponiblas a prepaus de la lenga e de la cultura nòstras. Los messatges seràn adaptats en foncion del parlar de cada territòri cobèrt.
 
L’Ofici Public lançarà son servici “socializacion” a partir del mes de setembre. Aurà per foncion d’acompanhar las collectivitats qu’auràn l’intencion de prepausar una politica lingüistica o qu’i poirián èsser incitadas. S’agís subretot d’anar pels parçans ont i a fòrça causas a far. “A còps, de servicis o d’elegits son desprovesits quitament se son de bona volontat, çò a dit la presidenta de l’ÒPLO, (…) cream de supòrts. Son de kits de comunicacion que s’i tròban a l’encòp de possibilitats d’accions e las ressorsas cap a las qualas se virar”. Seràn aviadas d’anóncias bilinguas sus las linhas Tolosa-Aush e Pòrt Bou-Salsas. Se lo procès se generalizarà a l’ensemble del malhum TER? Segon Dòna Claveau, las dificultats serián essencialament “tecnicas” e pas mai juridicas puèi que la lei Molac portèt un assentament legal a la preséncia de las lengas dins l’espandi public.
 
Segur que la presidenta de l’ÒPLO e conselhièra regionala foguèt questionada a respècte de la censura parciala de la Lei Molac pel Conselh Constitucional. Expliquèt que s’esperava pas a se sentir tant “umiliada” e considerèt que senhoreja encara una paur “irracionala” tocant a las lengas. Un primièr comunicat comun a totes los oficis publics (Bretanha, País Basco, Catalonha e Occitània) foguèt publicat lo 27 d’abril al moment de la sasina dels Savis. Un autre signat dels presidents serà publicat lèu-lèu. “Coneissètz mon perfil, ai pas accedit a aquel mandat en essent una militanta, çò diguèt Charline Claveau, […] contèsti pas la lectura del Conselh Constitucional, contesti çò que per ieu ten de l’acte politic, çò es s’autosasir [de l’article sus l’immersion] alara que foguèt pas sasit aquí dessús”.
 
Manifestament esmoguda, la presidenta de l’OPLO estimèt que la posicion de Jean-Michel Blanquer consistissiá a dire que l’immersion noirís lo separatisme: “Que me digan qual noirís lo separatisme quand i a una tala manca de respècte dels dreits culturals alara que sèm supausats los respectar, es la lei NOTRE qu’o ditz!”. Charline Claveau confirmèt sa preséncia als recampaments organizats lo 29 de mai pel collectiu Per que viscan nòstras lengas a Pau e a Baiona.
 
 
 
 
Clamenç Pech


 

Hyper fière de croiser les affiches en gare de Bordeaux de la campagne de communication lancée par l’office public de la langue occitane ! Et oui, plus que jamais, aujourd’hui, il nous faut garder la gnaque ! #occitan#pourqueviventnoslanguespic.twitter.com/0ndDPYbgaF

— Charline Claveau (@CharlineClaveau) May 26, 2021