La societat Shell deurà reduire d’un 45% sas emissions de gases d’efièch de sarra abans 2030. Es aital que la justícia dels Païses Basses a donat rason a sèt associacions environamentalistas e a establit que Shell “pòt” e “deu” jónher l’Acòrdi de París contra la crisi climatica e demesir sas emissions.
 
Es lo primièr còp qu’un tribunal obliga una societat petrolièra de reduire sas emissions; e aquò pòt marcar un precedent dins lo combat per demesir los efièches del cambiament climatic.
 
“Es una victòria monumentala per nòstra planeta e per nòstres filhs, e un grand saut devèrs un avenir abitable per totòm”, çò a assegurat Donald Pols, director de l’associacion environamentalista Milieudefensie, una de las associacions que faguèron lor denóncia contra Shell.
 
En febrièr passat, la justícia neerlandesa aviá ja ordenat que Shell paguèsse per sos escampaments de petròli dins lo dèlta de Nigèr.