Dempús dera crisi provocada per escandal de corrupcion en Partit Popular (PP), segontes uns documents publicadi ager peth jornau El País, eth president espanhòu Mariano Rajoy a convocat ua reünion extraordinària des dirigents deth partit entà deman dissabte. Mentretant milèrs de persones manifestauen ager de ser deuant des sedences deth PP de diuèrses ciutats der Estat espanhòu en tot demanar era dimission deth govèrn.

Es dirigents deth PP qu’an tostemp negat qu’auessen crubat gratificacions en nere, mès agèr eth jornau espanhòu El Paísque publiquèc documents dera comptabilitat intèrna que gerien es èx-clavaires deth partit, Luís Bárcenas e Álvaro Lapuerta. Segontes aqueri documents publicadi, i a de pagaments periodics en nere tà toti es dirigents deth partit, tanben tar actuau president deth govèrn espanhòu, Mariano Rajoy, e tara secretària generau deth PP, María Dolores de Cospedal.
 
Segontes aqueres informacions, aquera comptabilitat secrèta serie estructurada en tres seccions: era prumèra, des aportacions de sòs que bèri empresaris hègen ath PP en concèpte de dons, damb era data dera aportacion, era origina e era quantitat; era dusau, dera gessuda de sòs, de pagaments, damb era data, era quantitat e eth destinatari; e era tresau seccion, eth resultat restant des movements de sòs.
 
Cada an, ua part des sòs arrecebudi se reservaue entà entrar-la en Banca de Vitòria, qu’en 2003 e siguec absorbida per Banesto. Totun, solament se n’i entraue ua part. Alavetz, s’era rèsta de dons non se declarèc jamès, be s’agirie d’un cas de finançament irregular deth PP.
 
Ath delà des pagaments a Rajoy e a Cospedal, tanben cònsten quauqui pagaments a dirigents coma Rodrigo Rato e Jaime Mayor Oreja pendent es ans que sigueren vicesecretaris deth partit, autant coma as secretaris generaus Francisco Álvarez-Cascos, Javier Arenas e Ángel Acebes.
 
Rajoy qu’ei en aqueres nòtes a compdar der an 1997 e enquia 2008, damb pagaments semestraus de 2 100 000 pessetes, o trimestraus de pòc mès d’un milion de pessetes. E a compdar der an 2002 passen a èster de 12 600 èuros semestraus o 6300 trimestraus; ei a díder, 25 200 èuros per an.
 
Rato crubaue 6850 èuros trimestraus, mès es pagaments mès gròssi anauen tà Javier Arenas e tà Álvarez-Cascos: 9 900 èuros trimestraus. María Dolores de Cospedal foguèt dos viatges gratificada, dus trimèstres a 7500 èuros cadun.
 
Hè pòques setmanes que se publiquèc que Bárcenas, er èx-clavaire deth partit, e auie pagat gratificacions a dirigents deth partit en nere, çò qu’es dirigents deth PP an tostemp negat.
 
Era comptabilitat que gerie Bárcenas non rebat cap es sòs qu’eth partit e arrecebie der estat laguens eth finançament public des partits. Aquera comptabilitat sonque mòstre es dons privats d’enterpreneires e companhies de construccion. Ei eth cas de Luis del Rivero, que paguèc 120 000 èuros en 2004, quan ère vicepresident de Sacyr Vallehermoso, e 260 000 èuros en 2006, quan ja n’ère president. Tanben i a tres entrades de Juan Miguel Villar Mir, president de OHL, de 100 000, 180 000 e 250 000 èuros en 2004, 2006 e 2008.
 
Mès dons: eth de José Mayor Oreja, president de FCC Construcción –e frair der èx-ministre– que paguèc 90 000 èuros e 75 000 èuros en dus pagaments en 2008. E Mercadona, ua des cadies mès granes de supermercats, i é marcada en tot hèr dus pagaments, en 2004 e en 2008, de 90 000 èuros e 150 000.
 
Segontes El País, toti an negat –maugrat era informacion documentau– auer hèt cap de don ath Partit Popular.
 
Entre es donadors, i cònsten tres acusadi en ahèr Gürtel. Pablo Crespo, ex-numèro dus deth hilat corruptiu, que paguèc, en mai de 1999, 21 milions de pessetes; Alfonso García Pozuelo, proprietari de La Constructora Hispánica, que hec sies pagaments d’entre 18 000 e 30 000 èuros; e Juan Cotino, dera enterpresa Sedesa, que paguèc 200 000 èuros en 2004.
 
 
 
 
FM/V