Lo Comitat dels Dreches Umans del Conselh d’Euròpa demanda a Espanha la mesa en libertat dels presonièrs politics catalans e lo retirament dels mandats d’arrèst europèus pels exiliats.
 
Se deu clavar lèu l’enquista del Comitat dels Afars Legals e dels Dreches umans de l’assemblada parlamentària del Conselh d’Euròpa a prepaus de l’usatge politic de la justícia que lo fan los estats espanhòl e turc, e se n’es avançat las conclusions. Son netas e claras. “Mai d’un politician catalan de naut nivèl foguèron jutjats e puèi condemnats per de declaracions fachas dins l’exercici de lors mandats politics en sosten al referendum inconstitucional d’independéncia de Catalonha d’octòbre de 2017”, çò assegura lo rapòrt elaborat pel socialista leton Boriss Cilevičs.
 
Aquela comission parlamentària demanda a las autoritats espanhòlas que càmbien lo còde penal per que se reforme los delictes de “rebellion” e “sedicion”, que se despenalize l’organizacion de referendums considerats illegals e que s’elimine la possibilitat de penas talament desproporcionadas per “de transgressions non violentas”. S’i apond la demanda que “se considère la gràcia o l’excarceracion” dels presonièrs “condemnats per lor ròtle dins l’organizacion del referendum inconstitucional e de las manifestacions multitudinàrias pacificas qu’i son restacadas”. E mai exigís que se quite de perseguir los que son en exili e los nombroses èx-nauts responsables acusats a l’espèra d’un jutjament “restacat al referendum de 2017”.
 
 
Quitar d’exigir un pentiment e una reeducacion
 
Fin finala, lo rapòrt demanda a las autoritats espanhòlas que cèssen d’exigir dels presonièrs politics catalans un pentiment e una reeducacion. Concretament, lo rapòrt vòl que las autoritats espanhòlas “arrèsten de demandar als politicians catalans d’abjurar lors opinions politicas prigondament enrasigadas en escambi d’un regim penitenciari mai favorable o de la possibilitat d’una gràcia”. Suggerís ça que la que se poiriá exigir d’eles “que s’engatgen a perseguir lors tòcas politicas sens recórrer a de mejans illegals”.
 
Fa qualques meses, la comissària dels Dreches Umans del Conselh d’Euròpa, Dunja Mijatović, demandèt a l’estat espanhòl de reformar las leis suls delictes restacats a la libertat d’expression, e d’abusar pas de las denóncias dels delictes d’enaurament del terrorisme, d’ofensas religiosas, de discors d’òdi e difamacion o d’injúrias al rei que pòrtan de puniments “innecessaris o desproporcionats”.

 
 

1/ Today @PACE_LegalHR adopted a report by @Boriss_Cilevics on "Should politicians be prosecuted for statements made in the exercise of their mandate?". Referring specifically to #Turkey and #Spain, it stressed the need to protect politicians' freedom of expression.

— PACE_Legal (@PACE_LegalHR) June 3, 2021